Вокзалдар қызметі талапқа сай ма?

Қызылорда өңірінде сонау Орынбор-Ташкент теміржолымен қатар салынған, іргетасының қаланғанына ғасырдан аса уақыт өткен, бүгінде тарихи жәдігерге айналған вокзалдар көп. Қызылорда магистральдық желі бөлімшесі директорының орынбасары Жандарбек Саятұлы Өтегенов аймақтағы вокзал шаруашылығының жай-күйін әңгімелеп берді. – Біздің көп вокзалдар сонау өткен ғасырлардың басында салынған. Әрине, вокзал құрылысы жүргізілген кезең талабымен қазіргі ғарыштық даму, сандық жүйелер енген кезең талабын салыстыруға келмейді. Дегенмен сол кезде салынған тарихи жәдігерлер әлі күнге халықтың игілігіне жарап, толық жұмыс істеп тұр. Заман талабына сай оларға қазіргі заманауи технологиялар орналастырылған. Уақытылы жөндеуден өткізіліп, барынша күтімге алынған олардың сырты ескі болғанмен, сүйегі мықты. Ұлттық компания тарапынан вокзалдарды сауықтыру, жаңарту бағытындағы «100 вокзал» бағдарламасымен өңірде біршама жұмыстар атқарылды. Кей станцияларда жаңа вокзалдар салынды. Сапақ, Бекбауыл, Қорқыт, Диірментөбе станцияларындағы ескі вокзал ғимараттары тұрғындардың сұранысы болмауынан биылғы жылдың соңғы тоқсанына дейін жергілікті атқарушы билік органдарына өткізіліп, есептен шығарылады, қазір құжаттары рәсімделіп, әзірленуде, – дейді Жандарбек Саятұлы. Айтуынша, «ҚТЖ» ҰК» АҚ «100 вокзал» бағдарламасы аясында Сыр өңірінде 10 вокзал салу жұмысы 2011 жылдың сәуір айында басталып, 2013 жылы жаңа вок- залдар, яғни жаңадан салынған вокзалдар-жолаушыларға қызмет көрсететін өндірістік пункттер пайдалануға берілген. Олар бекеттердегі жергілікті тұрғындардың орналасу тығыздығына қарай үш түрлі болып белгіленген екен. Жаңа ғимараттар типіне қарай ең кішісі 18 шаршы метрден басталып, 125 шаршы метрлік көлемді құрайды. Мәселен, Қамыстыбас, Жалағаш станцияларында 1-типті, Аралқұм мен Тереңөзек станцияларында 2-типті, Сапақ, Бекбауыл және Шорнақ станцияларына 3-типті ғимараттар салынған. Станциядағы жолаушыларға қызмет ету мүмкіндігіне қарай, ол жердегі тұрғылықты халықтың тығыздығы мен жолаушылар нөпіріне қарай сараланып салынған бірінші типті вокзал тәулігіне 100 жолаушыға қызмет көрсетуге есептелінген. Екінші типтілері тәулігіне 50 адамға, үшінші типті вокзалда тәулігіне 10 адамға қызмет көрсетіледі деп есептелінген. Осы жолаушыларға қызмет көрсететін өндірістік пункттердің бірқатары кезінде салынғанмен бүгінде пайдаланылмайтындығы туралы да пікірлер айтылып жүр... – Қолданысқа берілгеніне он шақты жылға жуықтаған жаңа вокзалдардың кейбірі өз функциясын атқармай отырғаны рас. Себебі, кейбір станцияларға жолаушылар тасымалдайтын пойыздар тоқтамайды, сондықтан вокзал ретінде толыққанды жұмыс жасамай отырғанымен ол пункттердің бірінде станция қызметшілері отыр, тағы да басқа қажетке пайдалануда. Және кезінде кеткен кемшілік, бұл пункттер қыста суық, жазда ыстық болғандықтан жұмыс жасауға қолайсыз болып отыр. Сондықтан, сондай қолайсыздықтарды біртіндеп жойып жатырмыз. Өткен жылдары Жалағаш станциясындағы вокзал-пунктіне өзіміздің құрылыс-жөндеу бригадамызбен құрылыс-монтаж жұмысын жасадық, шатырына жылу мен суықты өткізбес үшін минералды мақта төсеп, төбесін қайта жаптық. Жылу жүйелері тексеруден өткізіліп, жаңалап ауыстырылды. Бесарық станциясында да жылу жүйелері ауыстырылды. Ал халық көп қоныстанған, жолаушы пойыздары аялдайтын вокзалдар өз қызметін толыққанды атқарып отыр, – дейді Ж.Өтегенов. Айтуынша, бүгінгі таңда аймақ бойынша барлық вокзалдар санитарлық сақтық жабдықтарымен толық жарақталған. Карантин талаптары қатаң сақталады. Қызылорда вокзалы ғимаратынан жолаушылардың кіріп-шығуы, қол жүктері арнайы құрылғылармен жарақталған пунктте бақылап-тексеріледі. Ана мен бала бөлмесі бар, күту залында электронды кезек жүйесімен қызмет көрсетіледі, мүгедектерге арналған күту бөлмесі жарақталған, медициналық пункт жұмыс істейді. Қауіпсіздік үшін ескерту, белгі беру және т.б. жүйелер (Скуд) енгізілген, СКБ-қауіпсіздікті сақтау (жұмыс бөлмесіне бөгде адамның кіруін шектеу) жүйесі оналастырылуда. Бірінші санаттағы Қызылорда вокзалы шілде айынан бастап «ASHYQ» жобасымен жұмыс жасайтын болады.