Атырауда биылғы жартыжылдықтағы жүк айналымы 105% орындалды

Атырау жүк тасымалы бөлімшесі бойынша биылғы жылдың жарты жылында жүк айналымы жоғары болды. Алты айда жоспардағы 4828 млн.тн.км-нетто 5069,5 млн.тн.км-нет- тоны құрап, жоспар 105 пайызға орындалды, деп хабарлайды Rail-newskz. Сондай-ақ СД жоспарына сай жүк тиеу 100%, вагонның орташа статистикалық салмағы – 101,1, тиелген вагонның динамикалық салмағы – 102,3, жүк вагондарының тиелген вагондарға шаққандағы жүрісі – 106,5, пойыздың орташа салмағы – 101,4, локомотив жүрісі 102,9 пайызға орындалды. Техникалық жоспар бойынша пайдаланым жұмыстарының негізгі 5 көрсеткіші орындалды, яғни пайдаланым жүк айналымы – 102,9%, жүк тиеу – 100,2, вагонның статистикалық жүктемесі – 101,3, тиелген вагонның динамикалық жүктемесі – 101,4, жүк вагондарының тиелген вагондарға шаққандағы жүрісі 102,8 пайызға орындалды. Жоспар бойынша кейбір көрсеткіштердің межеден төмен болуының өз себептері бар. Алдымен оған орташа жүк тиеудің және тиелген жүк вагондарының кемуі, транзиттік тасымалдың азаюы себеп. Әлемді шарпыған індеттің де әсері бары анық. Әсіресе еларалық экономикалық қарым-қатынасқа ықпалын тигізді. Соның да әсерінен, экономиканың негізгі бөлігін құрайтын өңірдегі мұнай өнімдерін өндіру, оны тасымалдау көлемі, құрылыс материалдары мен халық тұтынатын басқа да тауарлар тасымалы қалыпты деңгейді тұрақтай алмағанын айта кеткен жөн. Соның ішінде ресурсұстаушылардан қара мұнай өнімдеріне деген тапсырыс бұрынғыға қарағанда төмен болғанын көреміз. Оған пандемиямен қатар нарықтағы ауқымды дағдарыс, мұнай бағасының тұрақсыздығы, өнімнің болмауы және сатып алушылардың төлемқабілетсіздігі де себеп. Тәжікстан, Донецк бағытына жөнелтілетін мұнай өнімдері келісілмеген. Қытайға жөнелтілетін кокс, пропан жүктерін түсіруге конвенциялық тыйым қойылғаны, Қытай аумағында тастанды пойыздардың жиналып қалуы және Ортаазиялық темір жол арқылы өтетін кейбір жүктердің шектелуі де жалпы жүк тиеу көлеміне әсер етпей қоймады. Атырау жүк тасымалы бөлімшесі өндірістік-техникалық бөлім мамандарының айтуынша, сонымен қатар өткен мерзімде транзитті тасымал көлемінің кемуі де байқалады. Бөлімшемен бұрынғыға қарағанда тәулігіне екі пойызға – Қиғаш түйіспесінен 1 пойыз, Құлсарыдан тәулігіне 1 пойыз кем қабылдануда. Жарты жылда жұмыс вагондарының айналымы 77,9%-ды құрады, оның себебі вагон тиеуді игермеу, тиелген вагондарды қабылдаудың кемуі, автобұғаттаудың тоқтауы және жылдамдықты шектеуге ескерту берілуі де вагон айналымына әсер етті. Жергілікті вагондар жоспарының орындалуы 86,5% құраған. Ол «ТШО» ЖШС, «Карат», «АтырауИнжСтрой», «Уральская нефтехимическая компания», «Алан», «Петрохимикал» сынды компаниялардың атына келген жүкті Құлсары, Мақат, Махамбет, Ақжайық, Атырау, Аққыстау станцияларында уақытында түсіре алмағандықтан кеміді. Оған алдымен жүк қабылдаушылардың өздері кінәлі, яғни кірме жолдардың алыстығы, локомотивтерді күту, түсіру орнының бос болмауы, жүктің қатып қалуы, жұмыс күшінің болмауы, т.б. себептер көп. Пойыздар қозғалысының техникалық жылдамдығы 91,7%- ға орындалып, 4,21 км/сағатқа кеміді. Учаскелік және техникалық жылдамдығының кемуіне Атырау- Қиғаш, Мақат-Сағыз, Мақат-Атырау, Мақат-Құлсары учаскелерінде тәулігіне шамамен 50 жағдайға жылдамдықты шектеуге ескерту берілуі әсер еткен. Атырау мұнай өңдеу зауытының 10 қаңтар мен 5 ақпан аралығында бірқатар технологиялық қондырғыларының жөндеуге тұруы, осы мерзімде АО «KEGOC» желісінде электрожабдықтау бойынша бүкіл облыста дерлік қайта-қайта жарықтың сөнуі кейбір көрсеткіштер көлемін азайтып жіберді. Қатты желдің екпіні де жылдамдықты шектеуге мәжүрлейді. Қаңтар айында 34 (8 жолаушы, 26 жүк) пойызы кестеден кешігіп келген. Соған орай ақпан айында Мақат-Атырау, Атырау-Қиғаш, Мақат-Құлсары учаскелерінде 43 технологиялық «толаскез» беріліп, электр желілері, ВЛ-СЦБ құралдарын жөндеу үшін автобұғаттау орын алған. Сондай-ақ ДУОМАТ, УНИМАТ, Жейсмар жол машиналарымен жол жұмыстарын жүргізу үшін де сәуір айында 39 технологиялық толаскез алынған. Сонымен қатар кей учаскелерде пойыздар қозғалысы автобұғаттауды тоқтатып тастау арқылы жүзеге асырылған, ал ол жылдамдықтың кемуіне әсер етеді. Дегенмен, 7 негізгі көрсеткіш жүз пайыздан асса, қалғандарының орындалуы 80-90 пайыз шамасын құраған.