Атырау теміржолшылары да Қостанайға көмек қолын созуда
Атырау облысы бойынша меншікті тілші
Қостанай облысында болып жатқан төтенше жағдайға байланысты әр өңірден теміржолшылар қаржылай, азық-түлікпен, басқалай да көмек қолдарын созуда, деп хабарлайды Rail-news.kz.
Атырау теміржолшылары да қарап қалмады. Атырау магистральдық желі бөлімшесінің директоры Елеубай Сапаров жеке қаражаты есебінен Қостанай облысы тұрғындарына 1 млн теңге қаржы аударды. «...Апат айтып келмейді. Тілсіз жау қаннен қаперсіз отырған тұрғындардың өмірін ойран етіп, бір-ақ күнде баспаналарынан, бар жиған-тергенінен айырды. Қостанайлық бауырларымыздың басына түскен ауыртпалыққа қабырғамыз қайыса отырып, қолдан келген көмекті жасау – борышымыз» дейді теміржолшы азамат.
«Аманат» партиясының Атырау облыстық фракциясының жетекшісі Амангелді Абдолов теміржолшы, партия белсендісі Елеубай Сапаровтың бастамасы өзгелерге де үлгі болып, көмек қорын толықтырып жатқандар қатары артып келе жатқанын жеткізді.