Елімізде жануарларды пойызда алып жүру тәртібі
Бұған дейін Ресейдегі пойыздарда үй жануарларын қожайынсыз тасымалдау қызметі артқанын жазған болатынбыз. Осы ретте еліміздегі жолаушылар пойызымен үй жануарларын тасымалдау мәселесі қалай іске асып жатыр деген сұрақ туындайтыны белгілі. Сол себепті бүгін еліміздегі пойыздармен жануарларды алып жүру ережесіне тоқталғымыз келеді. Өзіңізбен бірге жануарды жолға алып шықпас бұрын белгіленген арнайы ережемен танысып алғаныңыз жөн.
Еліміздің пойыздарында үй жануарларын тасымалдау шарттары
- Тек үй жануарлары
Жолаушылар пойызымен тек үй жануарларын алып жүруге рұқсат етілген, яғни мысық, ит және құстар. Тәртіп бойынша түлкі, қоян, жылан және басқа да жабайы аңдарды пойызда өзіңмен бірге алып жүруге тыйым салынған.
- Ветеринариялық құжаттар
Үй жануарлары мен құстарды пойызбен тасымалдау үшін сізге ветеринариялық паспорт немесе анықтама алу қажет. Ветеринариялық қадағалау туралы анықтама берілген күннен бастап үш күн ғана жарамды.
- Купені толықтай сатып алу қажет
Жолаушылар пойызымен жүру үшін жануардың иесі бүкіл купені сатып алуы тиіс, бұл басқа жолаушыларды аллергиялық реакциялардан қорғау үшін қажет. Мәселен, сіз жұбайыңыз, балаңыз және итіңізбен кетіп бара жатсаңыз, 1 бала билетін аласыз, қалған 3 орынға ересек адам тарифі есептеледі. Бір сөзбен айтқанда жануарға ересектердің билетін аласыз.
- Жануарды арнайы тормен алып жүріңіз
Пойызбен жол жүргенде үй жануарларын арнайы тор немесе контейнерге салып алыңыз. Егер итіңіз ірі болса оның ауызында тұмылдырығы болу керек. Сондай-ақ ірі екі итті алып жүруге ғана рұқсат етіледі. Оның үстіне иттің жанында қарайтын адамы болу міндетті. Егер сіз бірнеше ит алып жүретін болсаңыз ҚТЖ-ға бес күн бұрын жүк вагонынан орынды жалға алу бойынша өтінім беруіңіз керек.
- Көзі көрмейтіндерді бағыттағыш иттер
Көзі көрмейтін иесін ертіп жүретін иттер кез келген вагонмен жүре алады. Олар үшін толық билет құны алынбайды, тек үстеме төлесе жеткілікті.
- Егер жабайы аң болса
Жабайы аңды тек жүк вагонымен алып жүре аласыз. «Жолаушылар тасымалы» АҚ-ның бекітілген ережесі бойынша жабайы аңды жолаушылар пойызының купесімен алып жүруге тыйым салынған.
- Тағы нені ескеру керек?
Пойыздағы үй жануарлары үшін иелері ғана жауапты. Олар жануарды торда ұстап, станцияда далаға шыққанда үнемі бақылауда ұстауы қажет. Сондай-ақ төрт аяқты досын тамақтандырып, оның артын жинап отыруға міндетті.
Сондай-ақ жануармен мейрамхана вагонына кіруге рұқсат жоқ, тек көзі көрмейтіндерді бағыттап, алып жүретін иттерге кіруге рұқсат етілген, оның өзінде арнайы үстел мен орындық тағайындалған жағдайда ғана.
Жолаушылар мен пойыз қызметкерлерінің өміріне қауіп төндіретін иттерді алып жүруге болмайды.
Мамандардың айтуынша, кейбір жануарлар түрлі ауруына байланысты ұзақ жол жүре алмайды, осы жағын да ескерген жөн.
Жануарларды пойызбен алып жүруге қатысты басқа да сұрақтарыңыз болса «Жолаушылар тасымалы» АҚ-ның 1433 нөміріндегі бірыңғай анықтама орталығына хабарласуға болады.