«Саламатты Қазақстан» пойызы Алтай ауданына келді

Алтай ауданы тұрғындары үшін қуанышты жаңалық – «Саламатты Қазақстан» пойызы Серебрянск қаласына қарасты Күмістау станциясына келіп тоқтады. Бұл әлеуметтік жоба Президент жанындағы Әйелдер істері және отбасылық-демографиялық саясат жөніндегі ұлттық комиссияның қолдауымен ұйымдастырылуда, деп хабарлайды Rail-news.kz.

Altainews.kz сайтының мәлімдеуінше, 18-19 қыркүйек күндері Серебрянск қаласының және маңайдағы ауылдар мен кенттердің тұрғындары сағат 09:00-ден 18:00-ге дейін үзіліссіз жұмыс істейтін медициналық және құқықтық кеңестерді тегін ала алады.

Қабылдау жүргізетін мамандар – терапевт, стоматолог, офтальмолог, ЛОР, хирург, уролог, маммолог, педиатр, сондай-ақ психолог, заңгер, медиатор.

Қабылдау барысында ультрадыбыстық зерттеу, қан қысымын өлшеу, экспресс-диагностика жүргізіліп, қажет кеңестер мен ұсыныстар беріледі. 

Пойызды қарсы алу рәсімі Күмістау станциясында өтті. Іс-шараға Серебрянск қаласының әкімі Нұргүл Бақынова және ішкі саясат бөлімі басшысының міндетін атқарушы Инна Коломиец қатысты. Олар медициналық пойыздың мамандарына және ұйымдастырушыларға алғыс айтып, сәтті жұмыс тіледі.

– «Денсаулық пойызы» – жай ғана медициналық жоба емес, азаматтарымызға шынайы қолдау. Әсіресе уақытылы дәрігерге көріне алмай жүргендер үшін үлкен мүмкіндік. Мұндай бастамалар халықтың денсаулығын нығайтуға, құқықтық сауатын арттыруға және қоғамдағы бірлікті күшейтуге сеп болады, – деді қала әкімі Нұргүл Бақынова.

Қала тұрғындары пойызды жылы қарсы алып, алғыс білдірді. Әсіресе зейнеткерлер, көпбалалы отбасылар мен жас аналар үшін бұл жоба үлкен көмек болды.

– Мен «Денсаулық пойызына» бірінші рет келіп тұрған жоқпын. Осы жобаның арқасында уақытылы тексеруден өтіп, құнды кеңестер алдым. Осындай мүмкіндік үшін көп рақмет! Жыл сайын келіп тұрса екен, – дейді Серебрянск тұрғыны Оксана Скоснягина.

«Саламатты Қазақстан» пойызы Алтай ауданының өзге елді мекендеріне де атбасын бұрып, сол жердің тұрғындарына да тегін көмек көрсетуді жалғастырады.