2025 жылы көлік полицейлері 89 мыңнан астам әкімшілік құқық бұзушылықты анықтады
2025 жылы Көліктегі полиция департаментінің қызметкерлері 89 397 әкімшілік құқық бұзушылықты анықтағандарын мәлімдеді, деп хабарлайды Rail-news.kz.
Ең жиі кездесетін құқық бұзушылықтар қатарында алкогольдік ішімдіктерді ішу немесе қоғамдық орындарға масаң күйде келу – 7 321 факт, ұсақ бұзақылық – 760 факт және т.б. Бұл туралы Көліктегі ПД бастығының орынбасары Құрмет Мәжікенов айтты.
Оның айтуынша Қарағанды-Сұрыптау станциясындағы желілік полиция бөлімінің қызметкерлері теміржол вокзалын шолу барысында қоғамдық орында алкогольдік масаң күйде жүрген Түркістан облысының 35 жастағы тұрғынын анықтап, ұстады. Ер адам медициналық куәландыруға жеткізу кезінде полиция қызметкерлерінің заңды талаптарына қарсылық танытып, бағынбаған.
«Аталған факті бойынша құқықбұзушы алкогольдік ішімдіктерді ішу немесе қоғамдық орындарға масаң күйінде келгені, сондай-ақ құқық қорғау органы қызметкерінің заңды өкіміне бағынбағаны үшін жауапкершілікке тартылды. Іс материалдары процессуалдық шешім қабылдау үшін сотқа жолданатын болады», - деді полиция полковнигі.