Балалар жаз қызығына кенелуде
"Қазақстан теміржолшысы" газетінің Жамбыл облысындағы меншікті тілшісі
«ҚТЖ – Жүк тасымалы» ЖШС «Жамбыл» филиалына қарасты құрылымдық мекемелер қызметкерлерінің балалары биыл Түркістан облысындағы «Тау гүлі Эдельвейс» балалар сауықтыру орталығында демалуда.
Олардың алғашқы легі онкүндік демалыстан оралып та қойды. Табиғат аясындағы саялы лагерь қазір екінші ауысымын ашып, жас жеткіншектерге естен кетпес жаз қызығын сыйлауда.
– Жыл сайын жазғы демалыста теміржолшылардың балаларын сауықтыру орталықтарына жіберіп отырамыз. Биыл Түркістандағы сауықтыру орталығына жалпы 2184 жасөспірімге жолдама беру жоспарланған. Оның ішінде 234 – филиал қызметкерлерінің, 1145 – ТЧЭ-30 Шу локомотив пайдалану депосы, 758 – ТЧЭ-31 Жамбыл локомотив пайдалану депосы, 47 – ТехПД Жамбыл мекемесі жұмысшыларының балалары, – дейді «Жамбыл» филиалы кадр бөлімінің бастығы Меруерт Баймұрзаева.
Алғашқы ауысымдағы демалысқа балаларды бастап барған кәсіподақ ұйымының төрағасы Серік Наурызбаев орталықтың сауықтыру іс-шараларымен танысып қайтты.
– «Қазтеміржолкәсіп» ҚБ Жамбыл филиалы балалардың жазғы демалысын тиімді ұйымдастыру мәселесін назардан тыс қалдырған емес. «Тау гүлі» лагері Түркістан облысы, Төлеби ауданында орналасқан.
Таулы жердегі сауықтыру орталығы саялы ағаштарының көптігімен, саф ауасымен ерекшеленеді. Мұнда жас жеткіншектердің таза ауада дем алып, спорттық және мәдени іс-шараларға қатысуы үшін қажетті жағдайлар қарастырылған. Спорттық жарыстар, ұлттық ойындар, танымдық кездесулер, шығармашылық байқаулар мен арнайы рухани-тағылымды кештер жиі ұйымдастырылып тұрады екен. Балаларды төрт мезгіл тамақтандырады. Ас мәзіріне дәруменге бай көкөністер мен жеңіл, денсаулыққа пайдалы тағам түрлері енгізілген. Жатын бөлмелері мен асханасының, бассейн, тағы басқа ойын алаңдарының санитарлық тазалығын көріп, көңілім толды, – дейді Серік Наурызбаев.
