Алпамыстар мектепке барды
Атырау облысы бойынша меншікті тілші
1 қыркүйекте сөмкесін асынып алғаш рет мектеп табалдырығын аттайтын балақайлар «Алпамыс мектепке барады» атты отандық фильмді еске түсіреді. «Мектепке жол» жалпы республикалық қайырымдылық акциясы аясында Атырау магистральдық желі бөлімшесі биыл 240 «алпамысты» мектепке шығарып салды.
Жыл сайын дәстүрлi түрде ұйымдастырылатын «Мектепке жол» акциясының мақсаты – көп балалары бар және аз қамтылған отбасыларға жаңа оқу жылына дайындық кезеңінде көмек көрсету және әлеуметтік себептер бойынша балалардың мектепке бармай қалуын болдырмау.
Бөлімшедегі персоналды басқару бөлімінің бастығы Анар Жалғасбаеваның айтуынша, 397 теміржолшының 1268 баласына 4 АЕК көлемінде көмек беріліп, биыл алғаш мектепке баратын 240 балаға дәптерден бастап қаламсап, қарындаш, бояу түрлері, сурет салғыш, т.б. оқу-құралдарына толы сөмке сыйға тартылған.
Сонымен қатар ұжымдық шартқа сәйкес кәсіподақ тарапынан да аз қамтылған және көп балалы теміржолшылардың, оның ішінде 3,4,5-класты станцияларда тұратын теміржолшылардың балаларын да мектепке дайындауға көмек берілген.
«Және биылғы жылы мектептің бастауыш сыныптарына баратын балаларға, жалғызбасты ана-әке және әлеуметтік жағдайы төмен отбасыларға да кәсіподақ өздері тарапынан көмек жасап, үлкен қолдау білдіріп отыр», – деді кәсіподақ төрағасы Марат Бисенғалиев.