ҚТЖ алғаш рет футзалдан балалар арасындағы республикалық турнир өткізді

«Қазақстан темір жолы» ҰК» АҚ балалар мен жасөспірімдер командалары арасында футзалдан ауқымды Республикалық турнирді тұңғыш рет ұйымдастыра отырып, балалар спортын қолдау көкжиегін кеңейтіп келеді. Жоба салауатты өмір салтын дәріптеуге, өңіраралық байланыстарды нығайтуға және бүкіл ел бойынша жас дарындарды іздеуге бағытталған, деп хабарлайды Rail-news.kz.

Тұңғыш біріншілікке 11 команда қатысты. Ұйымдастырушылар елордалық балаларға да, өңірлік құрамаларға да өздерін көрсетуге мүмкіндік беріп, қатысушылардың теңдестірілген құрамын жасақтады: 7 команда Астана қаласының намысын қорғап, өз алаңында мықты бәсекелестік тудырды; 4 команда өңірлерден (Ақмола, Қостанай, Қарағанды облыстары және Киік станциясы) келді. Шалғай елді мекендерден келген жас футболшылардың қатысуы турнирдің ерекше көркі мен маңызды әлеуметтік жетістігіне айналды.

Компания алғаш рет өзінің спорттық бастамаларын балалар сегментінде осындай жоғары республикалық деңгейге шығарып, жасөспірімдер үшін жарыстың толыққанды кәсіби атмосферасын қалыптастырды.

Шағын ғана Киік станциясынан келген команданың жеңісі турнирдің басты сенсациясы әрі ең шабыттандырарлық үлгісі болды. Балаларды бұл тарихи алтынға ғажайып жан – Киік станциясының аға электромеханигі, белсенді, ерікті және беделді «ҚТЖ-ның 100 жас есімі» корпоративтік жобасының қатысушысы Бекжан Совет бастап келді.

Бекжан жергілікті балаларды толығымен өз еркімен жаттықтырып, оларға жеке уақытын, күш-жігері мен жан-тәнін арнап жүр.

– Астанаға келе жатқанның өзінде осындай мүмкіндік бұйырғанына қатты қуандық. Ал Киік станциясының балалары бірінші орын алғаны – бұл жай ғана керемет, сөзбен айтып жеткізгісіз сезім! Мен әрбір шәкіртіммен шексіз мақтанамын. «ҚТЖ-ның 100 жас есімі» жобасының қатысушысы және волонтер ретінде мен адал еңбек пен өз ісіңе деген берілгендік ғажайыптар жасай алатынына әрқашан сендім. Біздің жеңісіміз мынаны дәлелдейді: сенің қайдан шыққаның маңызды емес – үлкен мегаполистен бе, әлде шағын станциядан ба. Егер көп еңбектенсең және өз ісіңді шын сүйсең, міндетті түрде бірінші боласың, – деп бақыттан бал-бұл жанған Бекжан Совет өз әсерімен бөлісті.

Ымырасыз әрі тартысты өткен матчтардың қорытындысы бойынша құрметті үшінші орын мен қола жүлдені «Достық» (Астана) командасы жеңіп алды, күмісті «Тарлан» (Астана) командасының жас футболшылары сенімді түрде иеленді, ал Киік станциясының құрамасы (Қарағанды) абсолютті триумфатор және ҚТЖ республикалық біріншілігінің тарихтағы тұңғыш чемпиондары атанды.