Жоса құмның отанында жүк тасымалы қарқын ала бастады
Қызылорда облысы бойынша меншікті тілші
Жосалы станциясы – Қармақшы ауданының орталығындағы 2 класты станция. Халық тығыз орналасқан өңірде теміржол көлігін пайдаланбайтын жан кемде-кем. Жолаушы халықтың дені пойызбен қатынаса, жергілікті кәсіпкерлер де теміржол тасымалына иек артуды құп көреді.
Негізгі жүк жөнелтуші «Анк Дәулет» серіктестігі өңірдегі жоса құмын өндіруші, жыл он екі ай сұраныс бойынша тапсырыс берушілерге жөнелтіп жатады. «Жаппасбаев», «Өмірзақов», «Ермекбаев» секілді жеке кәсіпкерлер де темір жолдың тұрақты клиенттері. Олар ауыл шаруашылығы өнімдері, құрылыс және тұтыну заттарын алдыру немесе жөнелтуде теміржол қызметін пайдаланады. Станция бастығы Бауыржан Баяновтың айтуынша, бекет жұмысын пайдаланатын кәсіпкерлер санын арттыру мақсатында аудан көлемінде теміржол көлігінің тиімділігін түсіндіру жұмыстары күн тәртібінен түскен емес. Жосалылық теміржолшылар биылғы жылдың өткен үш айын табысты қорытындылап отыр. Өндірістік жұмыстарының жалпы көрсеткіші 100-139,3 пайыз аралығында асыра орындалған.
Айтуынша, кәсіпкерлер тапсырыс берген вагондардың дер кезінде кірме жолға берілуін станция кезекшілері мен пойыз құрастырушылар бірдей қадағалап, жүк түсіру мен тиеу де белгіленген уақыт ішінде атқарылуы назарға алынады. Жүктен босаған вагонның кірме жолдан алынып, жылжымалы құрамға тіркелуі де кезекші мен пойыз құрастырушының және жүк құжаттарын рәсімдейтін операторлардың қатысуымен берілген уақыт аясында жүргізілуі шарт. Сондықтан станциядағы әр теміржолшы өз жұмысын қателіксіз, кәсіби деңгейде, бұлжытпай атқаруға күш салады.