Апатты жағдайдағы бекет жаңарды

Шалқар белгі беру және байланыс дистанциясы Кеңдала бекетіндегі ескі ғимаратты орталықтандырылған модульдік ғимаратқа ауыстырды. Бүкіл жұмыстарды атқарып шығу үшін 36 сағаттық толаскез алынған.    

Кеңдала бекетіндегі ғимараттың іргетасы 1980 жылы қаланған. Күтіп ұстаудың нәтижесінде ескі қондырғылардың өзі 40 жылдан аса уақыт тоқтаусыз жұмыс істеді. Дистанциядағы құрылғыларды кешенді түрде жаңарту жұмыстарының нәтижесінде ғимараттағы  аппараттар модульдік жүйеге ауыстырылды. Бұл биыл атқарылған ауқымды жұмыстың бірі. Дистанция қызметкерлері толаскез кезінде де пойыздар қозғалысын тоқтатпай, барлық қондырғыны көшіріп, тексеріп үлгерген.  

Барлық жұмыс  бір ай 20 күннің ішінде, жоспарға сай жасалып бітті. 45 күн бұрын дайындығымыз хабарланды. Соған орай жұмыс уақыты кестеге салынып,  жоспар бойынша аяқталып, бірде-бір жылжымалы  құрамның кешігуі орын алған жоқ,– деді Шалқар белгі беру және байланыс дистанциясының басшысы Айдар Еңсепов.  

Модульдік жарықтандыру дистанция жұмысына  үлкен тиімділік әкелмек.  Оның үстіне 20 жылдық кепілдігі бар. Қазір жарық беру сапасы жақсарған.  Бұрын жанып кеткен шамдарды алмастыру, көрінісін тексеру жұмыстары жоспармен атқарылса, автоматтандырылған жүйемен ол жұмыстар қажет болмай қалды. Адамның қатысуымен болатын жұмысты жеңілдетумен қоса, пойыздар қауіпсіздігін сақтауға ықпалы өте жоғары.

Шалқар белгі беру және байланыс дистанциясы басшысының айтуынша, бекеттегі жүйені толық жаңарту жұмыстары мамыр айынан басталған. Аралықтағы жұмыстар жүйеленіп, екі айға жуық уақыттың ішінде бекет жұмысы заманауи аппараттармен толықтырылып, орталықтандырылған жүйемен жаңарыпты.  36 сағаттық толаскез кезінде қондырғылар толық көшіріліп қана қоймай, ақаусыз жұмыс жасау жағдайы да тексерілген. Қауіпсіздік қалыпты жағдайда екеніне көз жеткізгеннен кейін ғана іске қосылған.  

Су жаңа модульдік орталықтандырылған ғимаратқа ауысқан Кеңдала бекеті енді радиобайланыс, телефон байланысы, белгі беру мен бағдаршамдардың орталықтандырылған қондырғылармен жабдықталған. Жаңа ғимарат кең әрі жарық. Кезекші отыратын бөлме, байланыс қондырғылары орналасқан  бөлме және орталықтандыру жұмыстары ұйымдастырылған үлкен аудитория бар. Байланыс желілерінің барлығы жертөле арқылы өткізілген. Ыстықта желдеткіш жұмыс істеп тұр. Қыста ғимарат электр қуатымен жылытылады. Қондырғылардың жәшіктерін қымтау жұмыстары да тиянақты аяқталған. Қыста қар, жазда шаң кірмейді. Ғимарат айналасы  жиналып, көгалдандырылып, көне ағаштар кесіліп, тал дарақ егіліп, эстетикалық түрге келтірілген.    

Бүгінде Кеңдала бекетінде дистанцияның үш қызметкері жұмыс істеуде.   Олардың міндетіне қондырғылардың қызметін қадағалаудан бөлек, станция кезекшілігін  де қоса  атқарады.  Ол үшін арнайы қосымша білім алып, емтихан тапсырып, кезекшілік құжат алған. Осылайша дистанция қызметкерлері байланыс желісін бақылаумен қатар станция кезекшілерінің жұмысын да игерген.  Кезекшілікті қоса атқару қызметі тек Кеңдала бекетінде ғана емес, Шалқар – Сексеуіл аралығындағы алты станцияда және Жем – Шалқар аралығында үш станцияда ұйымдастырылған.  

Шалқар белгі беру және байланыс дистанциясының басшысының айтуынша, дистанцияда енді ескірген бекеттер жоқ. Қырық жыл қызмет еткен Кеңдала бекетінің ғимаратын жаңарту секілді жұмыстар өткен жылы Жылан бекетінде де жүзеге асырылған. Шалқар белгі беру және байланыс дистанциясы бүгінде 33 бөлек бекеттерден құралған жалпы ұзындығы 595 шақырымды құрайтын темір жол торабына қызмет көрсетеді. Мекемеде 300-ден аса қызметкер еңбек етеді.   Дені  тәжірибелі электромеханиктер мен электромонтерлер. Дистанция бойынша автоматика, телемеханика және байланыстың жаңа жүйелерін енгізуде соңғы жылдары жұмыс қарқынды жүріп жатыр.