Су басу: қауіптің беті қайтты
«Қазақстан теміржолшысы» газетінің тілшісі
Ақкөл станциясында ЭЦ-қосыны ғимаратының астына су жиналып, бірінші қабатқа дейін көтерілген. Станция басшылығы мен басқа да құзырлы мекемелер суды сорғызып, қауіпті жойды.
Станция бастығы Нұрбол Назаровтың айтуынша, қосын қасына өрт сөндіру пойызы жеткізіліп, 4 мотопомпа күшімен суы сорылып, айналасына 200 қап құммен бөгет қойылған.
– Қыста жиналған қалың қар ғимарат түбіне жиналып ерігенде, асты суға толған. Үш күн ішінде станция теміржолшылары, жолшылар, белгі беру қызметкерлері, Ақкөл ауылындағы әкімдік өкілдері, соның ішінде төтенше жағдай бөлімі мамандары бірігіп, ғимаратты судан тазарттық. Станция қызметкерлері су тасқыны қаупінің уақытылы алдын алу және жою, сондай-ақ пойыздардың үздіксіз және қауіпсіз қозғалысын қамтамасыз ету мақсатында темір жолдарды су тасқыны кезеңіне дайындау бойынша жұмыстар жүргізуде. Атап айтқанда «ҚТЖ» ҰК» АҚ бұйрығымен жолдар мен жол бойындағы теміржол нысандарын қорғау бойынша арнайы іс-шаралар кешені енгізілді, – дейді станция бастығы.
Қазіргі уақытта көпірлер, құбырлар мен дренаждық құдықтардың тесіктерін қар мен мұздан тазарту, сондай-ақ тау және су бұрғыш арықтарды, науалар мен кюветтерді ашу бойынша дайындық жұмыстары жүргізілуде. Мамандар су қоймалары мен агротехникалық бөгеттердің жай-күйін тексереді, теміржол бойынша облыстық бөлімшелермен өзара іс-қимыл алгоритмдері пысықталды.