Тереңөзек станциясында жүк айналымы қарқынды
Қызылорда облысы бойынша меншікті тілші
Қызылорда ЖТ бөлімшесінің құрамындағы Тереңөзек станциясы – өңір теміржолының дамуына өзіндік үлес қосып келе жатқан 3-класты маңызды бекеттердің бірі.
Станциялықтар компания мен бөлімше басшылығы бекіткен өндірістік тапсырмаларды жоғары деңгейде орындай отырып, пойыздардың қозғалыс қауіпсіздігін толық қамтамасыз етіп отыр.
Станция бастығы Мұрат Маликовтың айтуынша, ұжымдағы әр теміржолшы өз ісінің маманы. Тапсырылған міндеттемелер теміржолшыға тән тәртіппен, мұқият әрі кәсіби деңгейде атқарылуда. Станция басшысы әріптестері арасында станция кезекшісі Нұрлан Кеңесбаев, аға жүк қабылдап-тапсырушы Айнұр Әбілханқызы, тауар кассирі Роза Көшербаева және пойыз құрастырушы Мұрат Бахтиярды ерекше атап өтуді сұрады. Айтуынша, олар жылдар бойы жинаған тәжірибесінің арқасында өздеріне жүктелген міндеттерді үлкен жауапкершілікпен атқарып, әріптестеріне үлгі көрсетуде.
– Станциядағы басқа теміржол мекемелерімен де қоян-қолтық жұмыс істеп, жауапкершілігіміз ортақ болғандықтан кәсіби деңгейдегі ынтымақтыстығымыз мығым, абыройымыз ортақ. Мәселен, СОБ электромеханигі Ерболат Бодықов пен ЭЧ электромеханигі Алмат Жүсіпбековпен жұмыс барысында күнделікті қарым-қатынастамыз, өз ұжымымыздың бір мүшесіндей болып кеткен, – дейді ол.
Станция бастығының мәліметіне сүйенсек, өткен жылы Тереңөзек станциясы 469 вагоннан жүк түсірген. Оның ішінде 100 жабық вагон, 90 ашық вагон, 275 цистерна болған. Тек желтоқсан айында 28 вагон жүк түсірілген. Қаңтар айында да жүк айналымының қарқыны жаман болған жоқ. Қысқасы, ұйымшыл ұжымның кәсіби біліктілігі жоғары мамандарының жұмысы нәтижелі еңбекпен қорытындылануда.
