Сексеуіл теміржолшыларының жемісті жылы

Сексеуіл станциясының теміржолшылары өткен жылы өзінің өндірістік әлеуетін нақты көрсеткіштермен дәлелдеді. Өндірістік көрсеткіштер жоспардан бірнеше есе асып, алдыңғы жылмен салыстырғанда тұрақты өсім мен тиімділіктің айқын үлгісі қалыптасты.

Есепті кезеңде станцияда 3235 пойыз тарқатылып, олардың құрамындағы 206 мыңнан астам вагон толығымен өңдеуден өтті. Бұл – әр пойыздың артында үздіксіз қозғалыс, дәлдік пен жоғары жауапкершілік тұрғанын айғақтайтын көрсеткіш. Сонымен қатар құрастырылған 4105 пойызға 212 515 вагон тіркеліп, жөнелтілген. Яғни Сексеуілде әрбір минут, әрбір технологиялық операция қозғалыс кестесіне бағынып, жүк ағыны іркіліссіз қамтамасыз етілді деген сөз.  

Жалпы алғанда, станцияның өңдеу үдерісіне 441 221 вагон қабылдануы Сексеуілдің теміржол картасындағы стратегиялық маңызын көрсетеді. Бұл – тек құрғақ сан емес, бұл темірдей тәртіпке, кәсіби шеберлікке және ұжымдық бірлікке негізделген тынымсыз еңбектің нақты нәтижесі. Станция бастығы Абдулхамит Тұрмантаевтың айтуынша, бұл табыстарда ұжымдағы әр теміржолшының үлесі бар.  

Сексеуіл станциясы үшін өткен жылы жай ғана есептік кезең емес, еңбек қуаты мен кәсіби шеберліктің салтанат құрған жылы болды. 1680 вагонға бекітілген жүк түсіру жоспарын 1840 вагонға дейін жеткізіліп, орындалу деңгейі 109 пайызды құрады. Бір вагонға шаққандағы жүктеме де айтарлықтай өсіп, тасымал тиімділігі жаңа деңгейге көтерілді. Бұл – тек сан емес, логистикадағы ұтымды шешімдер нәтижесі мен өндірістік тәртіптің жемісі.  

Ең басты жетістіктердің бірі – вагондардың тұрып қалу уақытының күрт қысқаруы. Егер бұрын сағатпен есептелген кідірістер орын алса, 2025 жылы бұл көрсеткіш бірнеше есе азайып, бір жүк операциясындағы орташа тұрып қалу уақыты жоспардағы 3,98 сағаттың орнына 1,92 сағат болып, тиімділік 207 пайызды көрсетіп, станция жұмысының шапшаңдығы мен икемділігін паш етті.  

Пойыздар мен вагондарды қабылдау, тарқату және жөнелту барысында станция теміржолшылары нағыз кәсіби мектептің үлгісін танытты. Олардың қатарында маневр диспетчері Еркебұлан Қарабаев, станция кезекшісі Серік Мырзағұлов, құжат сұрыптаушылар Венера Салмаева мен Нұргүл Сербаева, тауар кассирі Гүләнда Кабулова, жүк қабылдап-тапсырушы Сарбиназ Иманалиева сынды білікті мамандар бар.  

– Біздің бүгінгі жетістігіміз – есеп үшін жасалған көрсеткіш емес, маңдай термен келген нәтиже. Әр вагонның дер кезінде қозғалысқа шығуы, әр пойыздың қауіпсіз қабылданып-жөнелтілуі – Сексеуіл станциясы теміржолшыларының кәсіби бірлігі мен темірдей тәртібінің айқын дәлелі. Маневр диспетчерінен бастап жүк қабылдап-тапсырушыға дейінгі әр қызметкер өз ісінің маңызын терең сезінеді. Бізді алға жетелейтін күш – жауапкершілік, сенім және ортақ мақсат. Сексеуіл станциясы әрдайым өндірістік тиімділік пен қозғалыс қауіпсіздігін бірінші орынға қоя отырып, ел экономикасына қызмет етуді абырой санайды, – дейді станция бастығы Абдулхамит Тұрмантаев.