Бірлігі жарасқан ұжымның биік белесі
Қызылорда облысы бойынша меншікті тілші
Тәулік бойғы тынымсыз еңбек, келген-кеткен әр пойыздың әр вагонына тиелген жауапкершілік, қозғалыс қауіпсіздігіне деген жоғары талап – осының бәрі Белкөл станциясы теміржолшыларының күнделікті жұмыс көрсеткіші.
Белкөл – Қызылорда магистральдық желі бөлімшесіне қарасты өндірістік станция. Облыс орталығына жақын орналасқандықтан қалаға кіреберіс қақпа сынды, жүк тиеп-түсіру нүктесі ғана емес, тасымал қызметін пайдаланушылармен тығыз қарым-қатынас орнатқан, өндірістік тәртіп пен кәсіби талап қатаң сақталатын маңызды стратегиялық бекет. Мұндағы әрбір теміржолшы өз жұмысының жауапкершілігін, станция табысына қосатын үлесін терең сезінеді.
2025 жылдың қорытындысы Белкөл станциясы ұжымының жоғары кәсіби шеберлігін, ұйымшылдығы мен жауапкершілігін көрсетті. Станция бастығы Сұлтанахмет Матхановтың айтуынша, табыс ұжымның үйлесімді жұмысына байланысты, өткен жылы бекітілген барлық өндірістік жоспарлар толық әрі сапалы орындалған. Ұжымда еңбек тәртібі тұрақты, техникалық қауіпсіздік пен еңбек қорғау талаптары қатаң сақталады. Теміржолшылар маусымдық арнайы киімдермен толық қамтылған, әлеуметтік жағдайлары да назардан тыс қалмаған. Яғни жұмысшылардың алаңсыз еңбек етуіне барлық жағдай жасалған.
Өндірістік көрсеткіштерге тоқталар болсақ, желтоқсан айының өзінде-ақ белкөлдік теміржолшылар 64 вагонға 4231 тонна жүк тиеп, жүк түсіру жоспарын артығымен орындады. Жоспар бойынша 300 вагоннан жүк түсіру көзделсе, іс жүзінде 649 вагоннан 38 940 тонна жүк түсірілген. Бұл жай ғана сан емес, әрбір көрсеткіштің артында маңдай тер, ұқыптылық пен кәсіби есеп жатыр.
Станциядағы статистикалық жүктеме, бір жүк операциясы кезіндегі бос тұру уақыты, транзиттік вагондардың құжаттарын рәсімдеу барысындағы орташа кідіріс сынды маңызды өндірістік көрсеткіштердің барлығы жоспарға сай, одан да жоғары деңгейде орындалуда. Демек, табыс кілті – жұмыс үдерісін тиімді ұйымдастыра білу деген сөз.
Өткен жылмен салыстырғанда станцияда жүктелген вагондар саны 132 пайызға, ал жүк көлемі 131 пайызға артқан. Жоспарланған 448 вагонның орнына 726 вагон жүктелуі де ұжым еңбегінің жоғары көрсеткіші. Ал бір жүк операциясындағы бос тұру уақытының 10,25 сағатқа дейін төмендеуі – үлкен нәтиже. Мұның артында тәжірибе, тәртіп және әр ауысымдағы үйлесімді жұмыс жатыр.