«Тұлпар» зауыты «Тальго» вагондарын шығару жобасын аяқтады

«Тұлпар» вагон жасау зауыты» ЖШС-де испандық «Patentes Talgo» компаниясының технологиясы бойынша жүрдек жолаушылар вагондарын шығару жобасы аяқталды. Осыған орай өткен басқосуда зауыт ұжымы аз уақытта вагондарды құрастырудың барлық кезеңін игергені атап өтілді.

 Шараға «ҚТЖ» ҰК» АҚ басқарма төрағасының орынбасары Қанат Әлмағамбетов, «Өнеркәсіпті дамыту қоры» АҚ басқарма төрағасы Нұрлан Байбазаров, «Қазтеміртранс» АҚ басқарма төрағасы (бас директоры) Еркін Базарханов, «Жолаушылар тасымалы» АҚ бас директорының орынбасары Айбат Қанғалиев, ҚР-дағы «Patentes Talgo S.L.» филиалы техникалық қызмет көрсету базасының директоры Владимир Киселев пен «Тұлпар» вагон жасау зауыты» ЖШС бас директоры Сейітжан Ілиясов қатысты.  

– Ұлттық теміржол компаниясының басшылығы жолаушылар вагондары паркін жаңартуға үлкен көңіл бөліп келеді. Сондықтан бүгінгі оқиға бәрімізді   қуантпауы мүмкін емес. Patentes Talgоның зауытты басқарудан бас тартуына, жинақтаушы бөлшектерді дайындаушы-жеткізушілермен байланыстың үзілуіне, зауыттың үш жылдан астам мерзімге толық тоқтап тұруына байланысты барлық қиындықтарға қарамастан, зауыт ұжымы Үкімет пен «ҚТЖ» ҰК» АҚ-ның қолдауымен 2 құрамды немесе 62 вагонды жинап, өндірістік бағдарламаны толық көлемде іс жүзінде орындай алды. Бұл партияны жеткізу арқылы зауыт толығымен тұтынушылармен есептесіп, пайдаға шығады. Атап өтерлігі, бұл вагондар толығымен зауытта жиналды және «Жолаушылар тасымалы» АҚ-ның технолог қабылдап алушыларында вагондарды құрастыру бойынша сұрақтар туындаған жоқ, – деп атап кетті Қанат Әлмағамбетов.

 Биылғы шілде айының ортасында берілген 31 вагоннан тұратын бірінші құрам Нұр-Сұлтан – Алматы бағытында қатынауда. 31 вагоннан тұратын бұл құрам осы бағыт бойынша біраз жол жүріп, содан кейін Алматы – Павлодар бағытына қызмет көрсететін болады. Олар төмен платформаларға қол жеткізуге арналған көтергіштермен, жиналмалы үстелдермен, әрбір купеде температураны жеке реттейтін ауабаптау жүйесімен, себезгі қондырғысы бар санитарлық тораптармен және т.б. жабдықталған және ең бастысы, жолаушыларды қауіпсіз және ыңғайлы тасымалдаудың барлық талаптарына сәйкес келеді.  

«Жолаушылар тасымалы» АҚ жылжымалы құрам паркінде бүгінгі таңда «Тұлпар» вагон жасау зауытында Patentes Talgo технологиясы бойынша өндірілген 676 вагон бар, оның 240-ы кең шанақты.  

Вагондарды құрастыруда қолданылатын барлық материалдар мен жинақтар еуропалық сапа стандарттарына сәйкес келеді. Жобаның жергілікті құрам деңгейі 35%-тен астамды құрады. Бұл жобада зауыт алюминий шанақтарды дәнекерлеуден және оларды бояудан бастап, барлық жабдықтар мен жүріс бөлігін орнатудан бастап іске қосу-жөндеу жұмыстары мен сынақтар кешені аяқталғанға дейінгі вагондарды құрастырудың барлық кезеңдерін игерді.