Робот иттер пойыздың ақауын анықтайды
German Rail (DB) неміс компаниясы E-Check жобасы аясында робот иттерді пойыздың жөндеу жұмыстарына қолдануды көздеп отыр, деп хабарлайды Rail-news.kz IRJ сайтына сілтеме жасап.
Spotty атты робот ит пойыздың асты мен үстін тексеріп, ақауы бар жерлерді анықтайды.
Мұндай роботтың алғашқы баламасы Мюнхенде қолданылған, енді оны Кельн мен өзге қалаларда пайдаланбақ.
Цифрлы көмекшіні Boston Dynamics және Energy Robotics компаниялары жасап шыққан. Роботтың төрт аяғы бар, сондықтан ол ит сияқты жүре алады. Сондай-ақ ол еңкейіп, баспалдақпен көтеріледі.
Роботқа камера қойылған, соның көмегімен пойыз сканерленеді. Камера 2200 нүктені сканерлеп, 300 Гб мәлімет жинайды.
«Әзірге біздің қолымызда екі робот бар. Адамдарға пойыздың асты мен үстін тексеру қиынға соғады, сондықтан осы жаңа инновацияны жетілдіре түсуіміз керек. Мұның барлығын бағдарламалық қамтамасыз ету арқылы іске асырамыз, ол жұмысты жеңілдетеді», – дейді DB компаниясының цифрландыру және технологиялар жөніндегі басқарма өкілі Даниэла Герд Том Маркоттен.