Жылан пойыздарды екі сағатқа тоқтатып қойды

Токио мен Осака арасындағы жүктемесі жоғары бағытта жүретін жапондық «Синкансэн» жүрдек пойыздарының қозғалысы біраз уақытқа тоқтап қалды. Бұған себеп – электр сымдарына оралған жылан болды.

Ұзындығы шамамен бір метр болатын жылан электр желісіне оралып, электр тізбегінде қысқа тұйықталу туғызған. Хабарларға қарағанда, ол бағанаға өрмелеп шығып, жоғары кернеулі сымдар арқылы өтуге тырысқан кезде мерт болған.

Оқиға сәрсенбі күні кешкі сағат 5 шамасында «Майбара» мен «Гифу-Хасима» станцияларының арасында болған, деп хабарлады Kyodo агенттігі.

Жолаушылардың айтуынша, пойыздардың ішінде жарық пен кондиционер жұмыс істеп тұрғанымен, жүрмей тұрып қалған.

Kyodo жазуынша, Токиодағы станцияларда билет сататын автоматтардың алдында ұзын-сонар кезектер пайда болған. Пойыз қозғалысы кешкі сағат 7 шамасында қайта жанданған.

Айта кетейік, Жапонияда қазір төрт ұлттық мерекені біріктіретін «Алтын апта» өтіп жатыр. Осыған байланысты әуежайлар, вокзалдар мен басқа да көлік тораптарында жүктеме ерекше артқан.