Ресей алғашқы жүрдек пойызын 2027 жылы сынақтан өткізбек
Ресей Федерациясындағы алғашқы жоғары жылдамдықты пойызын тестілеу 2027 жылы жүргізіледі деп жоспарлануда. Бұл туралы ЖЖМ (жоғары жылдамдықты магистраль) ақпарат орталығы мәлімдеді, деп хабарлайды Rail-news.kz.
«Жаңа жоғары жылдамдықты пойыздың сынақтары 2027 жылға жоспарланған», - делінген хабарламада.
РФ Вице-премьері Виталий Савельев пойыз вагондарын дәнекерлеуге арналған телекөпір барысында нақтылап өткендей, сынақ бағдарламасына екі құрам қатысады.
«2027 жылғы сынақтарға жылжымалы құрамның екі үлгісі жіберіледі. Зеленоградтан Тверьге дейінгі трасса учаскесі полигон болады. Онда құрылыс-монтаждау жұмыстары белсенді жүріп жатыр», - деді ол.
Сынақтарға дайындықпен қатар «Уральские локомотивы» зауытында жоғары жылдамдықты электропойыздарды сериялы түрде шығару үшін өндірістік база қалыптастырылуда. Қазіргі уақытта жалпы ауданы 67 мың шаршы метр болатын жаңа нысандар салынып жатыр. Кешен құрамына шанақ компоненттерін қалыптастыру корпусы, электропойыздарды іске қосу-баптау корпусы, тартқыш жетекті сынақтан өткізу орталығы, конструкторлық орталық, сондай-ақ әкімшілік-тұрмыстық корпус кіреді.
Ақпарат орталығы атап өткендей, құрылысты 2026 жылдың IV тоқсанында аяқтау жоспарланған. Бүгінгі таңда құрылыс-монтаждау жұмыстарының шамамен 60 пайызы орындалды, технологиялық жабдықтарды сатып алу және жеткізу жалғасуда.
Сонымен қатар қолданыстағы өндірістік кешенді жаңғырту жұмыстары жүргізіліп жатыр, бұл жоғары жылдамдықты электропойыздарды сериялы шығаруға көшуді қамтамасыз етуге мүмкіндік береді.