Германияның Siemens Mobility компаниясы Испанияның ұлттық теміржол операторы Renfe өткізген тендерді жеңіп алды. Келісім аясында компания Испанияға 40 жүрдек пойызға дейін жеткізеді. Бұл бәсекеде Siemens жапониялық Hitachi Rail компаниясынан басым түсті, деп хабарлайды Rail-news.kz.
Келісімнің негізгі бөлігі 30 жеті вагонды электр пойызын жеткізуді көздейді. Оның құны 1,2 млрд еуроға бағаланған. Қосымша 10 құрамды сатып алу мүмкіндігін ескергенде, келісімнің жалпы құны 1,7 млрд еуроға жетеді.
Пойыздар сағатына 350 шақырым жылдамдықпен жүре алады. Әр құрамда екі класты 520 орын болады. Сондай-ақ жолаушыларға арналған багаж, велосипед және мүгедектер арбасын орналастыру аймақтары қарастырылады. Пойыздар қозғалысты басқару жүйелерімен, қашықтан диагностика жасау технологияларымен және апаттық жағдайда жүруге арналған аккумуляторлармен жабдықталады.
Siemens Mobility алғашқы бес құрамды келісім жасалғаннан кейін үш жарым жылға жуық уақытта жеткізуді жоспарлап отыр. Қалған пойыздар бес жыл ішінде тапсырылады.
Renfe үшін жеткізу мерзімін сақтау маңызды. Бұған дейін Talgo Avril жүрдек пойыздарын пайдалануға енгізу үш жылға кешіккен еді. Сондықтан жаңа келісімде өндіріс пен жеткізу кестесіне ерекше назар аударылмақ.
Жаңа пойыздар Siemens Mobility әзірлеп жатқан бесінші буындағы Velaro Novo платформасына негізделеді. Өндірушінің мәліметінше, бұл платформа алдыңғы буынмен салыстырғанда 10%-ға сыйымды, 15%-ға жеңіл және 30%-ға дейін энергия үнемдейтін болады.
Испанияға арналған тапсырысты есептегенде, Velaro Novo пойыздарының расталған келісімшарттар бойынша жалпы саны 50 құрамға жетеді. Бұған АҚШ-тағы Лос-Анджелес – Лас-Вегас жүрдек теміржол жобасы мен Вьетнамға арналған жеткізілімдер де кіреді.
Баға жағынан да Испанияға арналған тапсырыс ерекшеленеді. Қазіргі бағам бойынша, Renfe-нің негізгі тапсырысындағы бір вагонның орташа құны шамамен 6,5 млн доллар болады. Бұл Калифорниядағы жүрдек теміржол жобасына ұсынылған бағаға қарағанда едәуір төмен.
