Еуропада жүк вагондарының дөңгелектерін тексеру талаптары күшейтіледі
Еуропада 2023 жылы Швейцариядағы Готтард базалық туннелінде болған апаттан кейін жүк вагондарының дөңгелектерін техникалық тексеру аралығы қысқартылады. Жаңа талап бойынша тексерулер дөңгелек түріне қарай әр 50–300 мың шақырым сайын жүргізілуі мүмкін. Бұған дейін кей жағдайда бұл көрсеткіш 660 мың шақырымға дейін жеткен, деп хабарлайды Rail-news.kz.
Жаңа шаралар Еуропалық одақ теміржол агенттігі (ERA) үйлестіретін JNS бірлескен хатшылығы аясында әзірленді. Қосымша визуалды тексеру, жарықшақтар мен қызып кету белгілерін анықтау қарастырылған. Кейбір дөңгелек пен тежегіш жүйелері үшін бақылау аралығы шамамен 50 мың шақырым болады.
2023 жылғы 10 тамызда Готтард туннеліндегі жүк пойызының апатына 11-вагонның дөңгелегінің сынуы себеп болған. Ол небәрі 50 мың шақырым жүргенімен, сол кездегі талап бойынша жоспарлы тексеруге дейін әлі айтарлықтай қашықтық қалған. Дөңгелек сынғаннан кейін пойыз қозғалысын жалғастырып, нәтижесінде 16 вагон рельстен шыққан.
Апат салдарынан инфрақұрылым мен жылжымалы құрамға келген шығын шамамен 150 млн швейцар франкі болды. Туннельдің бір құбыры бір жылдан астам уақыт жабылып, Еуропадағы трансальпілік теміржол тасымалына айтарлықтай шектеу енгізілді.
Қатаң талаптарды енгізудің негізгі бастамашыларының бірі Швейцария болды. Ел өзінде дөңгелектерді тексеру аралығын қысқартып, кейбір дөңгелектердің ең төменгі рұқсат етілген диаметрін арттырды және қызып кетуден кейін қосымша тексеру енгізді.
ERA/JNS аясындағы жаңа талаптар әзірге ЕО үшін міндетті регламент емес, ұсынымдық сипатта. Оларды енгізу ұлттық органдар мен теміржол компанияларының құзырында. Швейцария жаңа нормаларды ұлттық заңнамаға енгізуді жоспарлап отыр.
Сонымен қатар вагон иелері, операторлар және техникалық қызмет көрсетуші ұйымдар арасындағы жауапкершілікті бөлу мәселесі әлі толық шешілген жоқ.