Жапонияда Токио – Нагоя маглев желісінің құрылысы қайта жандануы мүмкін

Жапонияда Токио – Нагоя бағытындағы жоғары жылдамдықты маглев желісінің құрылысын қайта бастауға жол ашылды. Сидзуока префектурасының губернаторы Ясутомо Судзуки мен JR Central компаниясы қоршаған ортаны қорғау шараларын қарастыратын келісімге қол қойды, деп хабарлайды Rail-news.kz.

Құрылыс 2017 жылы Ои өзенінің су деңгейіне әсер етуі мүмкін деген экологиялық қауіпке байланысты тоқтатылған еді. Жұмыстың нақты қашан басталатыны әзірге белгісіз.

Алғашқы 286 шақырымдық Токио – Нагоя учаскесін 2027 жылы іске қосу жоспарланған болатын. Алайда жоба бірнеше рет кейінге шегеріліп, енді желі 2036 жылдан ерте пайдалануға берілмейді. Құрылыс құны да бастапқы 5,5 триллион иенадан шамамен 11 триллион иенаға өсті.

Жапонияның SCMaglev жүйесі аса өткізгіш магниттерге негізделген. 2015 жылы сынақ кезінде L0 сериялы пойыз сағатына 603 шақырым жылдамдықпен жүріп, әлемдік рекорд орнатқан.

Токио – Нагоя желісі кейін Осакаға дейін ұзартылуы тиіс. Жоба толық іске асса, Жапонияның негізгі мегаполистері арасындағы сапар уақытын айтарлықтай қысқартуы мүмкін.