Францияда алғаш рет аккумулятормен жүретін пойыздар іске қосылды

Францияда аккумулятормен жүретін пойыздар алғаш рет тұрақты жолаушылар тасымалына шықты. Шілде айының соңында елдің оңтүстігінде төрт вагонды контактілі-аккумуляторлы пойыз іске қосылса, бір айдан кейін Окситания өңірінде үш вагонды екінші құрам қатынай бастады, деп хабарлайды Rail-news.kz.

Бұл Франциядағы аккумуляторлық тартқышы бар моторвагонды жылжымалы құрамды коммерциялық пайдаланудың алғашқы тәжірибесі.

Пойыздар бастапқыда 2000 жылдары Bombardier Transportation компаниясы шығарған B82500 және B81500 сериялы дизель-электрлі құрамдар болған. Кейін олар Alstom компаниясының Креспендегі зауытында жаңғыртылып, дизель қозғалтқыштарының орнына жалпы сыйымдылығы 840 кВт/сағ болатын литий-ионды аккумуляторлар орнатылды.

Жаңа батареялар пойызға электр желісіне қосылмай 80 шақырымнан астам жол жүруге мүмкіндік береді. Рекуперация жүйесінің арқасында электр энергиясын тұтыну 20%-ға дейін төмендейді. Аккумуляторлардың болжамды қызмет ету мерзімі – 10 жыл.

Пойыздардың бірі Авиньон – Карпантра бағытында қатынап, электрлендірілген учаскелерде қозғалыс кезінде қуат жинайды. Екінші құрам 21 шақырымдық Ним – Вовер электрлендірілмеген желісінде жұмыс істейді және соңғы стансада тұрған кезде қуатталады.

Жобаны SNCF ұлттық теміржол тасымалдаушысы Alstom компаниясымен және Францияның бес өңірімен бірлесіп жүзеге асыруда. Оның жалпы құны 41 млн еуродан асады.

Аккумуляторлық пойыздарды енгізу Францияға электрлендірілмеген теміржол желілерінде дизель отынын пайдалануды азайтып, өңірлік жолаушылар тасымалын экологиялық таза технологияларға кезең-кезеңімен көшіруге мүмкіндік береді.