InnoTrans 2026 көрмесінде 120-дан астам теміржол көлігі таныстырылады
22-25 қыркүйек аралығында Берлинде көлік технологияларына арналған InnoTrans халықаралық көрмесі өтеді. Биыл әлемдік деңгейдегі ауқымды шара 15-рет ұйымдастырылмақ, деп хабарлайды Rail-news.kz.
Көрме Messe Berlin кешенінің 42 павильонында орналасады. Экспозиция бес негізгі бағытты қамтиды: теміржол технологиялары, инфрақұрылым, қоғамдық көлік, көлік интерьерлері және тоннель құрылысы. Сонымен қатар іскерлік бағдарлама аясында InnoTrans Convention конференциясы өтеді.
Ұйымдастырушылардың мәліметінше, биыл көрмеге әлемнің 60-тан астам елінен 3 мыңға жуық компания қатысады деп күтілуде. 2024 жылы InnoTrans көрмесіне 128 елден 169 мыңнан астам адам келген болатын. Биыл келушілер саны бұл көрсеткіштен де артуы мүмкін.
Көрменің ашық алаңындағы жалпы ұзындығы 3,5 шақырым болатын теміржол жолдарында 120-дан астам түрлі жылжымалы құрам мен арнайы техника таныстырылады. Олардың қатарында жол машиналарынан бастап жоғары жылдамдықты пойыздарға дейін бар.
Siemens Mobility Германияның өңірлік бағыттарына арналған электр желісінен де, аккумулятордан да қуат алатын жаңа электр пойызын, Vectron X локомотивін және Лондон метросына арналған пойызын көрсетеді.
Stadler компаниясы да жылжымалы құрамның бірнеше жаңа үлгісін таныстырады. Alstom Италияның ұлттық жолаушылар тасымалдаушысы Trenitalia үшін шығарылған Coradia Stream жылдам өңірлік электр пойызын және Traxx сериясындағы жаңа локомотивті ұсынады.
Испаниялық Talgo компаниясы Германияның жеке тасымалдаушысы FlixTrain үшін әзірленген алғашқы Talgo 230 қалааралық пойызын көпшілік назарына ұсынбақ.
Ашық экспозицияда бұдан бөлек Hitachi Rail компаниясының ETR1000 жоғары жылдамдықты пойызы, Škoda Group шығарған жаңа буындағы RegioPanter аккумуляторлы электр пойызы көрсетіледі.
Көрменің тағы бір маңызды жаңалығы – машиниссіз жүретін пойыз. Оны Siemens компаниясы серіктестерімен бірлесіп, Германияның теміржол инфрақұрылымы операторы DB InfraGO-ның AutomatedTrain жобасы аясында әзірлеген.
InnoTrans әлемдегі теміржол және көлік технологиялары саласындағы ең ірі халықаралық алаңдардың бірі саналады. Көрме екі жыл сайын Германия астанасы Берлинде өткізіледі.