Ресей теміржолдарында пойыздардың рельстен шығуы мен соқтығысуы 13%-ға артты
Ресейде теміржол инфрақұрылымындағы жылжымалы құрамның рельстен шығуы мен соқтығысу жағдайлары көбейген. Мемлекеттік теміржол қадағалау қызметінің мәліметінше, 2026 жылдың қаңтар-шілде айларында 150 оқиға тіркелген. Бұл өткен жылдың сәйкес кезеңіндегі 133 жағдаймен салыстырғанда 13%-ға көп, деп хабарлайды Rail-news.kz.
«Ресей темір жолдары» (РЖД) инфрақұрылымында да көрсеткіш 13%-ға өскен. Жеті айда 143 жағдай тіркелсе, 2025 жылдың осы кезеңінде олардың саны 127 болған. Шығыс полигонында өсім айтарлықтай жоғары болып, 50 оқиға тіркелген. Бұл былтырғыдан 43%-ға көп.
Теміржолдар арасында ең жоғары өсім Горький теміржолында байқалған. Мұнда оқиғалар саны былтырғы 4-тен биыл 17-ге дейін артқан. Ал Батыс Сібір теміржолында, керісінше, 20-дан 11 жағдайға дейін азайған.
Мамандар жалпы пайдаланымдағы теміржолдардағы оқиғалардың негізгі себептері ретінде маневрлік жұмыстар технологиясының бұзылуын (54 жағдай), жолды күтіп ұстаудағы кемшіліктерді (50) және жылжымалы құрамды жөндеу талаптарының сақталмауын (35) атап отыр.
Жалпы пайдаланымға жатпайтын теміржолдарда қаңтар-шілде аралығында 193 рельстен шығу және соқтығысу жағдайы тіркелген. Былтыр бұл көрсеткіш 182 болған. Өсім 6%-ды құрады.