Қазақстан аумағы арқылы 13 транзиттік дәліз өтеді
«Қазақстан теміржолшысы» газетінің тілшісі
Қазақстанда көлік саласының негізгі күші еліміз арқылы транзитті кеңейтуге бағытталған. Жақында «Магистраль» сарапшылар форумында сала мамандары осы тақырыпты талқылады.
Форумға қатысқан «KTZ Express» АҚ теміржол тасымалы департаментінің директоры Дария Қалиеваның айтуынша, соңғы 15 жылда Қазақстан транзиттік инфрақұрылымды дамытуда айтарлықтай серпінді жұмыстар жүргізе отырып, Еуропа мен Азия арасындағы маңызды транзиттік тораптың біріне айналды. Қазақстан аумағы арқылы бүгінде 13 көлік дәлізі, соның ішінде 5 теміржол және 8 автомобиль дәлізі өтеді.
– Көлік-логистикалық кешенді дамыту үшін еліміздің транзиттік әлеуетіне 35 млрд доллар қаржы инвестиция салынған. 13 мың км-ден астам автожол жаңғыртылып, 2,5 мың км теміржол салынған. Бүгінгі таңда ТХКБ бағдары бойынша барлық қатысушы елдердің инфрақұрылымын жақсартудың бірқатар жобаларын жүзеге асыру жоспарлануда. Соның ішінде Ақтау порты контейнерлік хаб құрылысы, Қытай-Қазақстан шекара өткелінің жаңа нүктесінде құрғақ порт салу, сонымен қатар ТХКБ-ге жанама өтетін Қара теңізге апарар жолдағы елдердің транзиттік қуаттылығын ұлғайту және біріктіруге бағытталған жобалар бар, – дейді Дария Қалиева.
Жиынға қатысушылар сонымен қатар Алтынкөл шекара станциясынан Поти мен Батуми порттарына бет аталатын контейнерлік шатл-пойыздардың іске қосылғанын тілге тиек етті. «Солтүстік-Оңтүстік» халықаралық көлік дәлізі ЕАЭО-дан Үндістан, Пәкістан және жақын Азия елдеріне жүк жеткізудің ең қысқа бағдары ретінде аталды. Спикердің айтуынша, Ресей, Түрікменстан, Иранмен бірге аталған бағдарды контейнерлік және вагондармен тасымалды жүзеге асыратын бағдар ретінде дамыту үшін бәсекеге қабілетті тарифтер әзірленген. Бүгінде бұл бағдар бойынша көмір, қара металл, минералдар мен астық тасымалданады.
«KAZLOGISTICS» Қазақстан көлікшілер одағы теміржол көлігі мәселелері жөніндегі атқарушы директоры Мұрадым Кұлтай осы «Солтүстік-Оңтүстік» халықаралық көлік дәлізінің Қазақстан үшін маңызына тоқталды. Дәліздің болашағы мен мүмкіндіктері зор екенін жеткізді.
– Бағдарды дамытудың объективті себептері бар. Әсіресе Каспийде мүмкіндіктер шектеулі. Бұл ретте Ресей теңіз арқылы бағдарды пайдаланып, Иранға жүк ағынын арттыруда. Түрікменстан, Ресей, Әзербайжан осы ағынды өңдеп үлгере алмай жатыр. Тағы бір мәселе ауа-райына байланысты туындайды, сол қолайсыздық осы ағын бойынша қозғалысты белгілі бір мерзімге тоқтата тұруға мәжбүр етеді. Одан басқа маңызды фактор – су астын тереңдету жұмыстарын қысқамерзімді жүргізу жұмыстары да теңіздегі тасымалды тоқтатуға әкеледі. Осының бәрі «Солтүстік-Оңтүстік» дәлізін дамыту қажеттігін және оған неғұрлым көбірек клиент тарту керектігін көрсетеді, – дейді спикер.