Цифрлық трансформация батыс теміржолының жұмысын жадандыра түсті
Ақтөбе облысы бойынша меншікті тілші
Ақтөбедегі «Пойыздар қозғалысын басқару» орталығының Маңғыстау бөлімшесі өнімді жұмыс істеп, табысын арттырып отыр. Диспетчерлер мұны цифрлық транформация жобасының жетістігі дейді.
Маңғыстау бөлімшесінде 2020 жылы 5498, 6 млн тонна/км жүк айналымы қамтамасыз етілген болса, 2021 жылы 6809 млн тонна/ км жүк тасымалданған. Бір жылда миллиондап артып отырған жүк айналымы – диспетчерлік орталықты бір жерден басқару мүмкіндігіне ие болғаннан кейінгі жетістіктер.
Маңғыстау өңірінің аумағы Тассай, Құрық порты қосылғаннан кейін 1340 шақырымға жетті. Атырау, Ақтөбеден бөлек Өзбекстан және Түркіменстан мемлекеттерімен шектеседі және Қазақстанның теңіз қақпасы Ақтау мен Құрық порты да түбекте.
Ақтөбедегі «Пойыздар қозғалысын басқару» орталығының Маңғыстау өңірі бойынша аға диспетчері Бауыржан Мырзабаев еңбек жолын 1997 жылы Маңғыстауда станция кезекшісі болып бастаған, Қазір осы Ақтөбедегі Пойыздар қозғалысын басқару орталығында Маңғыстау аумағындағы қозғалысты ұйымдастырып отыр. 25 жыл тәжірибесі бар үздік диспетчердің бірі.
Теміржолшылар алдағы уақытта құбырмен тасымалданатын мұнай өнімдерінің цистернаға көшірілуі мүмкін деген қауесет есітген.
Пойыздар қозғалысын басқару орталығына Маңғыстау өңірінен Бауыржан Мырзабаев бастаған 22 диспетчер Ақтөбеге 2020 жылдың қазан айында қоныс аударды. Барлық қызметкерлердің лауазымы сақталған. Отбасылық жағдайына байланысты екі адам кері қайтса, олардың орнына екі адам тағы Маңғыстаудан келіп жатыр. Жаңа жерге орналасып алған диспетчерлер әлеуметтік жағдайлары да келген уақыттан әлдеқайда жақсарғанын айтады.
Сонымен қатар, бұрын пойыз диспетчерлерінің еңбек демалысынан алынып тасталған алты күн қазір қайта қосылған. Соңғы уақыттары пойыз диспетчерлері жыл сайын 34 күн ғана демалып келсе, қазір 40 күн еңбек демалысына шығады және зиянды еңбек жағдайы үшін жалақыларына 12 пайыз ақша қосылып отыр. Диспетчерлердің әлеуметтік мәселелері де оңтайлы шешілді. Жалақыдан бөлек 2 жыл пәтер-ақысы төленеді. Алғашында 25 АЕК төленсе, кейін ол 40 АЕК- пен есептеліп, 130 мың теңгенің үстінде қаржы беріледі. Бұл көмек биылғы қараша айына дейін жалғасады.
Айтса айтқандай, бұрын бөлімшелер арасындағы пойыздардың уақытылы алынбай, екі бөлімшенің ортасында тұрып қалатыны жиі кездессе, бүгінде мүлде жойылған. Қозғалысты қашықтан басқару мүмкіндігіне қол жеткізген диспетчерлердің жұмысы жүйеленіп, цифрлы технологияның рахатына кенеліп отыр.