Жол шаруашылығында жаңа технология қолданылып жатыр

Хромтау-Алтынсарин темір жолының Ақтөбе бөлімшесі аумағында күрделі жөндеу жүріп жатыр. Жол төсемін қорғауға геотоқыма материал қолданылуда. Мамандар жаңа технология жол сапасын жақсартып, жолшылар жұмысын айтарлықтай жеңілдетеді деп болжам жасап отыр.

Никельтау, Әйтеке би, Хромтау учаскесіндегі жөндеу жұмыстары шілде айында басталды. Күрделі жөндеу кезінде рельсті шпалымен көтеріп, жол төсемінің үстіне геотоқыма материал жабылады. Мамандардың айтуынша, бұл шпал астындағы қиыршық тастың құммен араласып, суды сіңіріп, қалпын өзгертуден сақтайды. Жоспар бойынша бұл телімдегі күрделі жөндеу жұмыстары желтоқсан айында аяқталуы тиіс. Дегенмен, жұмыс қарқыны жоғары, сондықтан теміржолшылар жөндеу жұмыстарын қазан айында аяқтауды жоспарлап отыр. Қазіргі уақытта 15 шақырымда жұмыстар аяқталған.  

– Хромтау-Алтынсарин темір жолында жол төсемін қалыпқа келтіру үшін 2020 жылдан бастап күрделі жөндеу жұмыстары жүріп жатыр. 2020 жылы жолдың 25 шақырымы қалыпқа келді. 2023 жылы 35 шақырым жөнделді. Биылғы жоспар 41 шақырым. Үйтас-Құдықсай, Құдықсай-Жоса, Жоса-Аққұдық аралығындағы жол төсеніші реттеледі. Рельс пен шпал толық алынып, жер төсенішінің беті қырылады, – деп ақпар берді Ақтөбе магистральдық желі бөлімшесі жол бөлімінің жетекші инженері Медет Оразбаев.  

Никельтау жол дистанциясы жиырма жыл бұрын пайдалануға берілген Хромтау-Алтынсарин магистраліне қызмет көрсетеді. Жол төсемінде кемшін тұстар жоқ емес. Жаңбырлы кезде топырақ отырып, қалыпқа келтіру жұмыстары жиі жасалады. Техникамен жол төсеніштері қазылып, теміржол астындағы құм тегістеліп отырды. Техниканың мүмкіндігі 35-40 см жерді ғана қаза алады, ал жер төсенішінің биіктігі 7-8 метрге дейін кетеді. Ал темір жол астына үйілген топырақтың ең төменгі қабаты балшық боп езіліп, пойыз өткеннен кейін отырып қалады. Техника арқылы жолды қайта көтеріп, қайта тегістеуді қажет етеді. Бұл жолшылар жұмысын айтарлықтай қиындатады.  

– Ал мынау жаңадан қолданылып жатқан геотоқыма материал бойынан су өткізбейді, нәтижесінде су астына сіңбей, жанға ағып кетеді. Құрамы қатты болғандықтан қиыршық тасты да жібермейді. Материал қиыршық тастың астына түседі. Материал сапалы, мүмкіндігі мол, жол төсемін реттеу үшін енді рельсті қайта-қайта көтермейміз. Салынған жолды қалпында ұстап тұратын болады деген сенімдеміз. Материал Солтүстік Қазақстан облысынан келіп жатыр, – деді жол бөлімінің жетекші маманы.