Табыстың үш факторы
Жұмыс сипаты бойынша кластан тыс Алматы-2 станциясы жүк станциясы болып табылады. Оңтүстік астана Алматыдай алып мегаполистің жүк қақпасы өте ауқымды және жұмысы көлемді, барлық буындары өзара байланысып жатқан тұтас бір ағза сияқты.
Алматы-2 станциясының ұжымы пайдалану жұмыстарының жақсаруы үшін еңбектенуде, вагондарды түсіру мен тиеу, құрастыру, жөнелту, жалпы алғанда жүк операцияларының жылдамдығын арттыруға күш салуда. Вагондардың тұрып қалуы мен апатты жағдайды болдырмауға көп күш жұмсауда.
– Біздің жұмыста үш негізгі фактор болу керек. Бұл – әрбір қызметкердің өз функционалдық міндеттерін мінсіз орындауы, апатсыз және нәтижелі жұмысты қамтамасыз ету, сонымен қатар ұжымдағы тұрақты моральдық-психологиялық ахуал, міне, осы үш фактор табыстылық кепілі,– деп санайды станция бастығы Талғат Құлжабаев.
Алматы-2 – Алматы-1 станцияларының аралығы – бір жолды, 50 Гц айнымалы токтың электр тартқышымен электрлендірілген, тонналы рельс шынжырлары бар сигналсыз автобұғаттаумен жабдықталған. Пойыздардың қозғалысы автоматты локомотив сигнализациясының (АЛС) көрсеткіштері бойынша жүзеге асырылады. Станцияның негізгі жүк жөнелтушілері қатарында «Рахат», «Бахус», «Эфес» АҚ, «Alina Group», «Carlsberg» ЖШС сынды алпауыт компаниялар бар.
Станцияда негізгі көрсеткіштер өсуінің оң динамикасы байқалады, мысалы, өткен жылы жүк тиеу 101 пайызға орындалды, бұл – жоспардағы тәулігіне орта есеппен 38 вагон/1420 тоннаның орнына 38,4 вагон/1491,4 тонна тиелді деген сөз.
Жоспарлы тапсырмаға статистикалық жүктеме 104,6 пайызға орындалды. Вагондардың жұмыс паркі 12 айда 103 вагон жоспарымен нақты 95 вагонды құрады, 108,4% орындалды. Жергілікті вагондардың тоқтап тұруы жоспардағы 38,27 сағат бойынша 19,4 сағатты құрады, 197,3% орындалды.
Алматы-2 тек жүк станциясы емес, «Жолаушылар тасымалы» АҚ – «Оңтүстік» аймақтық филиалының жолаушылар вагондарын жасақтайтын негізгі пункт болып табылады. Бұл жерде тежегіш табандықтарын ауыстыру жұмыстары атқарылады, автотіркегіш бойынша созу, дөңгелек жұптарын ауыстыру, құрамдарды жабдықтау, сонымен қатар құрамдардың іші-сыртын жуу мен ТО-1,ТО-2,ТО-3 жөндеу жұмыстары жүргізіледі. Бүгінде Алматы-2 станциясынан 25 жұп жолаушылар пойызы қатынайды, оның ішінде 17 «Тальго» пойызы, «Тұлпар-Тальго» вагондарынан құрастырылған, оларды өңдеу үшін 3 маневрлік локомотив қолданылады.
Алматы-2 станциясын үшінші жыл басқару және пайдалану жұмысында мол тәжірибесі бар тәжірибелі теміржолшы Талғат Құлжабаев басқарады. Талғат Сопыбекұлы Жамбыл жол бөлімшесін басқарған, бірнеше жыл «ҚТЖ» ҰК» АҚ Орталық Азия бойынша өкілінің орынбасары болған шебер басқарушылық пен жақсы ұйымдастырушылық қабілеті қалыптасқан жан. Сондықтан Алматы-2 сынды үлкен станцияны басқару қиынға түспеген көрінеді.
– Өндіріс мәдениетіне көп күш жұмсаймыз. Жаңа технологияларды игеру, үлкен ақпараттық алаң біздің бөлімшенің жұмысына тән. Әрине, көп нәрсе қызметкерлердің кәсібилігіне байланысты, сондықтан кадрларды техникалық даярлауға баса назар аударылады. Қызметкерлер лауазымдық нұсқаулықтарды, қозғалыс қауіпсіздігі ережелерін, техникалық пайдалану ережесін бес саусақтай білуі міндеттеледі. Пойыздардың үздіксіз және қауіпсіз қозғалысын және станциядағы маневрлік жұмысты қамтамасыз ету үшін барлық құрылғылар, сондай-ақ қызметтік-техникалық ғимараттар жүйелі түрде тексеріледі. Жұмыс тұрақты режимде, әр қызметкер өз функциясын қатаң нұсқаулықтар мен ережелерге сәйкес орындауы талап етіледі, – дейді Талғат Сопыбекұлы.
Станцияда тек кәсіби мамандар шоғырланған. Мысалы, станция бастығының жедел жұмыстар жөніндегі орынбасары Манат Бекешев – қозғалыс шаруашылығының барлық сатысынан өткен маман. Станция бастығының логистика жөніндегі орынбасары Клара Қарамендинова да көп жылдық тәжірибесі бар жан, ал маневрлік диспетчер Ержан Оразалиев пен пойыз құрастырушылар Абылай Ермекбаев, Қанат Ахметов және Әділ Самаев осы станцияда «туып-өскен» байырғы теміржолшылар деуге болады.
Елена ҚОЛДАСБАЕВА, Алматы
Суретті сүсірген Александр ЖАБЧУК