ҚТЖ заңгерлері Локомотив құрастыру зауытын аралап көрді
«Қазақстан теміржолшысы» газетінің тілшісі
«ҚТЖ» ҰК» АҚ филиалдары мен еншілес ұйымдарының бір топ заңгерлері Локомотив құрастыру зауытына барып, машина жасау өндірісімен танысты, деп хабарлайды Rail-news.kz.
«ҚТЖ» ҰК» АҚ құқықтық қамтамасыз ету департаменті директорының орынбасары Ілияс Ерназаровтың айтуынша, тапсырыс қабылдайтын компаниялармен арадағы келісімшарттарға құқықтық сараптама жасайтын заңгерлер үшін бұл кездесудің маңызы зор.
– Қоғамда өз еліміздің кәсіпорындары не шығарады, неге отандық тауар өндірушілер жұмысы алға баспайды деген сыңайдағы түрлі пікір бар. Біз бүгін зауыт жұмысымен танысып қана қоймай, қазақстандық локомотивтерге шетелден сұраныстың жоғары екеніне көз жеткіздік, оның үстіне осы зауытпен келісімшарттарға құқықтық сараптама жасаған кезде туындайтын көптеген сұрақтарға жауап алдық, зауыт цехтарын аралап, тепловоз жасау процесін өз көзімізбен көрдік. Бұл бізге қызықты экскурсия ғана емес, жұмысымызға қажет мол тәжірибе болды, – дейді І.Ерназаров.
«ЛКЗ» АҚ сату бөлімінің бастығы Рауан Дөнсебаевтың айтуынша, биыл ашылғанына 13 жыл толған зауытта осы аралықта барлығы 419 локомотив жасап шығарылған. Оның екеуі – маневрлік, 41 – жолаушы локомотиві, қалғаны – жүк тепловоздары.
– Негізгі тапсырыс берушіміз – «ҚТЖ-Жүк тасымалы» ЖШС. Біздің бірінші мақсатымыз да ең алдымен ҚТЖ-ны локомотивпен қамтамасыз ету. Зауыттың жылдық қуаттылығы – 100 тепловоз. Сонша тепловоз шығару үшін мыңнан астам жұмысшы керек, бізде қазір 700-ге жуық адам еңбек етуде. Тапсырысқа орай былтыр 25 жүк, 18 жолаушылар тепловозын жасап шығардық, – дейді Р.Дөнсебаев.
Зауыт 2010 жылдан бері Тәжікстан, Қырғызстан, Әзербайжан, Молдова, Украина және Түркіменстан елдеріне 36 тепловозды экспортқа шығарған. Қазіргі таңда Моңғолия, Эстония елінен тепловозға сұраныс түсуде. Қазақстандық тепловоздардың артықшылығы – оның сервистік қызметінде екен, яғни сервистік қызмет көрсету мерзімі 120 күннен 184 күнге дейін созылады, бұл тепловоздарға бір рет техникалық қызмет көрсетілгеннен кейін 3 ай тоқтамай жұмыс істей береді, шығын аз кетеді. Дизель отыны да басқаларға қарағанда 15 пайыз аз жұмсалады. Негізгі бөлшектері – дизель моторы, компьютерлік аппаратурасы және тартымдық электр қозғалтқышы АҚШ пен Еуропадан сатып алынады, қалғаны қазақстандық зауыттардан алынады және өндіріс орнының өзінде жасалады.