«Қазақстан темір жолы» жыл қорытындысын шығарды
2024 жылы «ҚТЖ» ҰК» АҚ қызметтің негізгі көрсеткіштері бойынша тұрақты даму ұстанымын сақтап қалды. Компания жүктерді және жолаушыларды тұрақты тасымалдап, әлеуметтік міндеттемелерді сақтады, ауқымды жобаларды іске асырды, жаңа логистикалық шешімдер тапты, деп хабарлайды Rail-news.kz.
Жүк айналымында оң динамика сақталды, ол 272 млрд тонна-километрді құрады. Контейнерлік транзит сенімді қарқынмен өсуде, ол 1,4 млн ЖФЭ-ге жетті. Биыл ҚХР-мен тасымалдау жоспары мерзімінен бұрын орындалды. Қазақстан-Қытай түйіспелері арқылы тасымалдау көлемі шамамен 31,8 млн. тоннаға жетті, бұл 2023 жылдан 12% артық. Оның ішінде, Қазақстаннан экспорт 8,8% артып, 13,7 млн тоннаны құрады.
ҚТЖ қызметінің негізгі бағыттарының бірі инфрақұрылымды жаңғырту болды. 1400 км-ден астам жол жөндеудің әр түрлерімен жаңартылды. 1 мың шақырымнан астам жаңа темір жол құрылысы (Достық – Мойынты, Дарбаза – Мақтаарал, Алматы станциясының айналма жолы) жалғасты. Достық – Мойынты учаскесіндегі екінші жолды және Алматыны айналып өтетін теміржол желісін келесі жылы аяқтау жоспарлануда.
Инфрақұрылымдық жобалар іске қосылғаннан кейін транзиттің екі есеге – жылына 55 млн тоннаға дейін ұлғаюы болжануда. Қазақстандық дәліздерге жүк ағындарын тарту үшін компания терминалдық желіні кеңейтеді. Қазірдің өзінде бар 5 терминал (Ляньюньган порты, Сиань қаласындағы Құрғақ порт, Достық станциясындағы терминал, Khorgos Gateway Құрғақ порты, Құрық портындағы паром кешені) алдағы екі жылда тағы 9-мен толықтырады. Ағымдағы жылы Алматы қаласында, Әзірбайжанның Алят теңіз портында, Венгрия астанасы – Будапештте, Мәскеу маңындағы Селятино кентінде терминалдар құрылысы басталды. Қытайлық серіктес – Ляньюньган портымен бірлесіп, Ақтау портында контейнерлік хаб салу басталды.
Айта кету керек, 2024 жылы іске қосылған Сиань қаласының құрғақ портындағы қазақстандық-қытайлық терминал Транскаспий бағдары бойынша Қытайдан транзитті 30 есеге арттыруға мүмкіндік берді.
Сингапурлық PSA-мен ынтымақтастықта әзірленген жіксіз цифрлық дәліз маршруттағы Қазақстанның рөлін күшейтуде. Жүк тасымалы саласындағы клиенттік сервисті толық цифрландыруды «Бірыңғай цифрлық терезе» қамтамасыз етсе, ҚТЖ бұнда компанияның еншілес кәсіпорындарының барлық коммерциялық функцияларын біріктірді. Жүйе уақытты үнемдейді және тасымалдау процесін мүмкіндігінше ашық етеді.
ҚТЖ-ның операциялық және қаржылық тұрақтылығын Fitch, S&P халықаралық рейтингтік агенттіктері тағы да растады.