Ертең «Қазақстанның көліктік әлеуеті: өткені мен болашағы» атты халықаралық конференция басталады
«Қазақстан теміржолшысы» газетінің тілшісі
Ел Тәуелсіздігінің 30 жылдығы мен мемлекет қайраткері Нығметжан Есенғариннің 80 жылдық мерейтойына орай биыл 29 қыркүйекте елорда төрінде «Қазақстанның көліктік әлеуеті: өткені мен болашағы» атты халықаралық ғылыми-тәжірибелік конференция өтеді, деп хабарлайды Rail-news.kz. Жиында егемен еліміздің жетістіктері мен нарықтық экономикаға көшу кезіндегі аумалы-төкпелі кезеңде Н.Есенғариннің елімізде көлік-логистика саласын қалыптастыруға қосқан орасан зор үлесі кеңінен сөз болады. Іс-шараға алыс-жақын шетелдерден беделді халықаралық деңгейдегі логистикалық ұйымдар өкілдері, көлік және логистика саласындағы оқу орындарының басшылары мен белгілі қоғам қайраткерлері, билік өкілдері, теміржолшылар қауымы қатысады. Конференцияға Қазақстан теміржолының дамуына қомақты үлес қосқан теміржолшы ардагерлердің арнайы шақырылуы бұл шараның маңызын арттырып, салмағын еселей түспек. Олардың қатарында «ҚТЖ» ҰК» АҚ Консультативтік кеңесінің мүшелері – Қуаныш Котырев, Қадыл Таласпеков, Ескендір Рахметжанов, Бақтарбек Жүнісов, Болатбек Дүйсемалиев, бұрынғы жол бөлімшелері басшылары – Әмірхан Төреханов, Қалтай Сәмбетов, Алданыш Нұрымов, саланың ардагерлер ұйымының басшылығында жүрген белгілі байырғы теміржолшылар – Берік Айтбеков, Серік Сүлейменов, Марат Хамзин, Асқар Сәрсенбеков бар. Ауқымды шараның ресми бөліміне ҚР Индустрия және инфрақұрылымдық даму министрі Бейбіт Атамқұлов, «ҚТЖ» ҰК» АҚ басқарма төрағасы Нұрлан Сауранбаев, Қытай, Ресей теміржолының өкілдері, Қарағанды облысы, Алматы, Нұр-Сұлтан қаласы әкімдіктерінің өкілдері қатысады деп күтілуде. Конференция бірнеше маңызды тақырыптарды арқау ететін сессиялардан тұрады. Трансеуразиялық көлік бағдары бәсекелестігі күшейген тұста Қазақстан аумағы арқылы транзиттік дәлізді дамыту мәселелері сөз болатын бірінші сессияда халықаралық көлік тасымалы компаниялары мен ұйымдарының өкілдері сөз алады. Екінші сессия темір жол көлігі жұмысының тиімділігін арттырудың басты факторы ретінде цифрландыруды қарастыру мәселесіне арналады. Үшінші сессия – Қазіргі заманғы логистика және көлік-инновациялық шешімдер тақырыбын қамтиды. Шара бейнеконференция түрінде өтеді.