Түбектің Табылдысы 70 жаста

Биыл Маңғыстау теміржолының белді ардагерлерінің бірі, аймақтың Құрметті азаматы, Құрметті теміржолшы Табылды Әміров жетпіс жасқа келді. Ғұмырының қырық жылға жуығын түбек теміржолының дамуына сарп еткен ол тек көлік қатынасы саласында ғана емес, өңірдің әлеуметтік-экономикалық бағытына да тікелей атсалысып, еңбек сіңірген азаматтар қатарынан.  

Табылды ағамыз 1953 жылдың көктемінде Атырау облысы Новогат ауданында дүниеге келген.  Орта мектепті бітіре салысымен өзінің болашақ бағытын теміржолмен байланыстырады. Ақтөбе теміржол техникумына оқуға түседі. Кейін Алматы теміржол институтында жоғары білім алады. Саладағы еңбек жолын 1978 жылы Шетпе станциясында станция кезекшісі болып бастайды. Бұл міндетті Аққыстау станциясында да жалғастырып, өзінің іскерлігін паш еткен оны 1981 жылы жауапты жұмысқа тағайындайды. Содан  бірнеше станцияның басшысы болады. Әр жылдары Үстірт, Сай-Өтес, Шетпе, Құлсары станцияларының тізгінін ұстап, өзін станция жұмысында әжептәуір шыңдаған ол 1993-2007 жылдары Маңғыстау теміржолының басқаруын қолына алады. Одан кейін бірнеше жыл сол бөлімшенің бас инженері қызметін атқарады. Зейнеттік демалысқа Маңғыстау станциясының бастығы жұмысынан шығады. Теміржолдан зейнетке кеткенмен еңбектен біржола қолүзбейді. 2016-2022 жылдар аралығында Мұнайлы аудандық қоғамдық кеңесінің төрағасы болып, ауданның тыныс-тіршілігіне белсене атсалысады. Бұл қоғамдық жұмыстағы алғашқы қадамы емес еді. 2003 жылдан бастап III, IV, V, VI шақырылған Маңғыстау облыстық мәслихатының депутаты болып жүріп те талай мәселенің шешілуіне   мұрындық болды. Кезінде оның араласуымен Маңғыстау теміржолына жергілікті кадрларды даярлау мақсатында Ақтау қаласынан Тынышбаев атындағы Көлік Академиясы ашылған еді. Кейіннен академия колледжге айналды. Осы оқу орындарының кейін де қалыпты жұмыс істеуіне қолдан келгенше көмектесті.  

–  1970 жылдары Астрахань-Гурьев теміржолы салынған болатын. Онда ауылда өскен бізге теміржол бұрын көрмеген таңсық дүние, зулап пойыздар жүріп жатады. Теміржолды қызықтап жүрген сондай күндердің бірінде вокзал жанында теміржолшы формасын киген келісті бір адамға ерекше назарым ауды. Өзін ұстауы мен үсті-басына тамсанып тұрып, сол маңда біреуден сұрасам оның  Аббас Сембаев деген теміржолшы, станция бастығы екенін білдім. Сондағы алған әсерім, мамандық таңдауыма септік етті. Сол уақыттан бастап теміржолшы болуға ықыласым ауды. Мектепті бітіргеннен бірден теміржол техникумына жол тарттым, – деп еске алады Табылды Әміров өзіне өмірлік азық болған кәсібі туралы сөз қозғағанда.  

   Табылды Әмірұлы солай кездейсоқ кездесуден кейін теміржолшы болуға белді бекем буады. Ата-анасы ауыл шаруашылығы саласында еңбек еткен, бауырлары да содан соң бірінің соңынан бірі теміржолға аяқ басып, салада Әміровтер әулеті қалыптаса бастайды. Бүгінде солардан тараған ұрпақ түрлі бағытта қызмет етуде. Өзі де бұл жолды таңдап, ұтпаса ұтылмаған еді. Талай жыл абыроймен міндетін атқарып, теміржолдың құрметті ардагері атанды. Әріптестерінің алдында жұмысты біліктілікпен ұйымдастыра алатын азамат, жас мамандарды еңбекке баулып, кәсіби біліктілігін жетілдіру бағдарламасы бойынша атсалысқан басшы ретінде танылды. Қазір де облыс, аудан көлемінде өткізілетін мәдени-көпшілік шараларға белсене араласатын ақылшы ақсақал, құрметті қонағы болып жүрген жандардан. «Өмір өзен, даңғыл жол» кітабының авторы.

– Теміржол – оңай сала емес. Жауапкершілігі жоғары. Менің де басымда қиын кездер көп болды. Оның бәрін еңсере білдік, абыроймен алып шығуға жұмыстандық. Мәселен, бұрын теміржолды су басып, шайып кететін кездер көп болатын. Әсіресе 1991 жылы, 1997 жылдардағы оқиғада соның кесірінен пойыздар апталап жүрмей, тоқтап қалды. Сол кездері әкімдікпен де жұмыс жүргізіп, неғұрлым тез қалпына келтіруге, қатынасты тоқтатпауға жұмыстандық. Қазір оның бәрі көрген түс сияқты. Немерелерге айтсаң ертегідей әңгіме. Солардан ширай-ширай өткенбіз. Өзім өмірімде теміржолмен бірге халық үшін де қызмет етуді мақсат тұтқан адаммын. Жұмыста жүргенде қоластымдағы қызметкерлердің барлық отбасылық жағдайын біліп, сұрап отыратынмын. Оларға қатысты алдымда өндірістік және тұрмыстық сұрақ тұратын. Егер тұрмыстық жағдайы келіспей, қандайда бір жетіспеушілікпен алаңдап жүрсе, ол жұмысына да әсер етуі мүмкін. Сондықтан жетістікке жету үшін қолымнан келгенше осы екі мәселені де қатар алуға тырыстым, – дейді кейіпкеріміз.  

Бәлкім содан да болар, бүгінде Табылды ағайымыздың тақса бір жейдеге сыймайтындай қатар-қатар медаль, төсбелгілері мен үйінің сөрелері толған түрлі деңгейдегі Құрмет грамоталары, Алғыс хаттар. Қазақстан Республикасы мәслихаттарының Құрметті депутаты, Мұнайлы, Исатай аудандары мен Маңғыстау облысының Құрметті азаматы. «Белсенді қызметі үшін» төсбелгісінің, «Еңбек ардагері» медалінің, Құрмет орденінің иегері.