Ақтоғайдың арда азаматы

Ақтоғай локомотив пайдалану депосының өсіп-өркендеуіне сүбелі үлесін қосқан теміржолшылардың бірі – Сейітбек Назарұлы. Бүгінде пайғамбар жасын бағындырып отырған ел ағасы темір жолда табаны күректей 40 жыл еңбек етіпті.

1961 жылы 1 қарашада Аягөз өңіріне қарасты Тарлаулы ауылында дүниеге келген Сейітбек ағамыз мектеп қабырғасында қоғамдық жұмыстардың бел ортасынан табылып, грекрим күресінен республикалық жарыстардың бірнеше дүркін чемпионы атанады. Алайда ол мектеп бітіргесін спорт жолымен кетпей, арман қанатында Алматы қаласындағы теміржол техникумына оқуға түсіп, оны үздік бітіреді. Осы кезеңнен бастап өмірі теміржолмен тұтасып өрілді. Тіпті 1980-1982 жылдар аралығындағы әскери қызметін де Мәскеу түбіндегі теміржол ротасында абыроймен атқарыпты. Әскерден оралысымен тепсе темір үзер жас жігіт салалық қызметтің қайнаған ортасынан табылады. 1984-1997 жылдары Ақтоғай станциясының локомотив пайдалану депосында 2-ТҚК цехының шебері болып еңбек етеді. Мамандыққа деген адалдық оны білім мен біліктілігін ұштап, үнемі ізденіс үстінде жүруге жетеледі. Осылайша еңбек ете жүріп Алматыдағы М.Тынышпаев атындағы Қазақ көлік және коммуникациялар академиясын сырттай оқып бітіреді. Ұзақ жылдар бойғы мол тәжірибе, ұйымдастырушылық қабілет жетістікпен қатар қызмет баспалдақтарымен өсуге жол ашады. Мәселен, 2002-2003 жылдары Ақтоғай локомотив пайдалану депосы директорының орынбасары, өндірістік пайдалану бөлімі бастығы қызметін жауапкершілікпен атқарады. Ал 2003-2007 жылдары «Локомотив» АҚ Аягөз локомотив пайдалану депосының Ақтоғай айналым депосында директор орынбасары қызметінде болды. Ал 2007-2016 жылдары «Локомотив сервис орталығын» да жоғары біліктілікпен басқарады. Әсіресе 2016-2020 жылдар ара лығындағы Ақтоғай локомотив пайдалану депосы филиалының директоры қызметін атқарған жылдары Сейітбек Назарұлы білікті машинистер мен машинист көмекшілерін, слесарьларды дайындауда күш-жігерін аямады. Бүгінде оның шәкірттері еліміздің әр түкпірінде еңбек етуде.  

Кейіпкеріміздің алғашқы еңбек жолы Ақтоғай локомотив депосының жаңа ашылған жылдарына дөп келіпті. Оны көптен танитын әріптестері ғимаратта жылыту жүйесі болмағанда, екі паровоз арқылы бүкіл депоны жылытып, теміржолшылардың жылы жерде жұмыс істеуіне жағдай жасаған тапқырлығын еске алды.  

1985-1990 жылдары Ақтоғой локомотив депосы ашылып, Ақтоғай-Саяқ, Достық-Алашанькоу теміржол телімдері салынды. Мақсат – ҚХР-мен қарым-қатынасты жақсарту, жүк және жолаушы тасымалын жолға қойып, ел экономикасын көтеру болатын. Ол үшін әлбетте локомотивтерге техникалық күтім жасаудың маңызы жоғары. Басшылық осы бағыттағы жұмыстарды Сейітбек Назарұлына сеніп тапсырды.  

– Ол күндер бүгінде тарихқа айналды. 1985 жылы Ақтоғай локомотив пайдалану депосының техникалық бақылау цехы ашылып, қырықтан аса білікті слесарьлар мен шеберлер жұмыла кірісіп, ең алғашқы 2 Т Э10Л-465 тепловозын дайындықтан өткізіп жолға шығарды. Қазіргі осы айтулы теміржолмен Қытай-Европа-Қытай, Мойынты-Балқаш, Саяқ-Ақтоғай, Достық-Алашанькоу бағытында жылжымалы құрамдар жүйіткуде. Ел үкіметі алға қойған мақсаттарды жүзеге асыру жолында осындай маңызы зор іс-шараларға қатысқанымды мақтан тұтамын, – дейді кейіпкеріміз.  

Адал қызмет әрдайым абыройға бөлейді. Осынау жылдар аралығында Сейітбек Назарұлы ел үкіметі мен ұлттық компания басшылығы тарапынан жоғары бағаланып, түрлі марапаттарға да ие болыпты. Атап айтсақ, Құрмет грамотасынан бөлек, 2013 жылы теміржол саласындағы айрықша еңбегінің нәтижесінде «Адал еңбегі үшін» медалін алды. 2015 жылы ҚР президентінің «ҚР Конституциясына 20 жыл» медалін, «ҚТЖ» ҰҚ АҚ Президентінің «Еңбектегі жетістіктері үшін» атаулы сағатымен марапатталды. Облыстық деңгейдегі мақтау қағаздары бір төбе.  

Сейітбек Назарұлы – жомарттық пен қайырымдылықтың да ерен үлгісін көрсетіп жүрген азамат. Ол жайында өзі көп сөз ете бермегенімен Ақтоғай, Аягөз өңірінің халқы жақсы біледі. Атап айтсақ, «Туған жерге тағзым» акциясы аясында өңірдегі әлеуметтік аз қамтылған отбасыларға қаржылай, азық-түлікпен үнемі көмек көрсетіп келеді. Сонау 2010 жылы Қопа ауылын тасқын су басқанда теміржол саласы басшыларының басын қосып, қызыл су алған үйлерді күрделі жөндеуден өткізіп берді. Биылғы көктемде өңірдегі он шақты елді мекенді су басқанда, жеке меншік үлкен жүк тиегішін су тасқыны қайтқанша ел игілігіне берді. Осылайша ауыл халқының ризашылығы мен батасын алды. Тарлаулы ауылындағы имандылық үйінің шығындарын да өзі көтеріп алып жүр. Саналы ғұмырында екі мәрте ұмра қажылығын, бір рет үлкен қажылық рәсімдерін өтеп қайтқан исламның бес парызына берік азамат. Жастардың спортпен айналысуына елеулі үлес қосуда. Мәселен, жыл сайын «Халықаралық дәрежедегі жаттықтырушы» В.Д.Жихарьев атындағы грек-рим күресінен республикалық турнир өткізіп, негізгі демеушісі болуда. Сейітбек Назарұлы отбасында да бақытқа кенелген жан. Зайыбы Сәулия Қалиасқарқызымен бірге төрт перзент тәрбиелеп өсірді. Қызы Гүлдана мен ұлы Нұржан әке жолын қуып, теміржолда еңбек етуде.