Дүниежүзілік еңбекті қорғау күнініне байланысты өткен шаралардың қорытындысы
Маңғыстау облысы бойынша меншікті тілші
Дүниежүзілік еңбекті қорғау күніне орай Маңғыстау теміржолындағы мекемелерде сәуір айында түрлі іс-шара, байқау, жиналыстар ұйымдастырылған. Қорытынды басқосу Маңғыстау қосалқы бөлімі мен Маңғыстау магистральдық желі бөлімшелерінің бас ғимараттарында басшылардың қатысуымен өткен ауқымды кездесуге ұласты.
Еңбек қауіпсіздігін сақтауға, өндірістегі жарақаттану, басқа да кері фактілердің алдын алу бойынша апталықтар да ұйымдастырылды. Қаза болған теміржолшыларды еске алып, үнсіздік минуттары жарияланды. Жұмыс орындары қалпына келтіріліп, әр телім, ғимараттағы жұмысшыларға атаулы күннің мән-маңызы бойынша кездесулер өткізілді. Балақайлар арасында сурет байқаулары ұйымдастырылды. Ең үздік еңбек қорғау бұрышы, санитарлық тұрмыстық жағдайлар, маман мен басшылар деген сынды сайыстарда еңбекті қорғау және жұмыс орнындағы қауіпсіздікке ерекше үлес қосқандардың мерейі артты.
– Дүниежүзілік еңбекті қорғау күнініне байланысты өткен шаралардың қорытындысы есебінде бөлімшемізде үлкен жиналыс болды. Учаске басшылары жұмыс орнында жарақаттарды болдырмау, қауіпсіздіктің сақталуы жөнінде өздерінің атқарып жатқан жұмыстарынан баяндама жасады. Еңбек қауіпсіздігін қамтамасыз ету бойынша ұсыныс-пікірлер айтылып, осы тұрғыда еңбегімен көзге түскендер марапатталды. Бөлімшеге қарасты барлық мекеме арасында болған байқау нәтижесі бойынша Аман Жанжігітов, Мұхит Рәтұлы, Мұрат Қарайдар «Үздік басшы», Дилором Бектауова «Үздік маман», Мамай Ақжігітов, Бахытжан Дәулетбаев, Салтанат Байтабынова, Абай Тоқтасынов, Сейтжан Үсен, Амангелді Мақсымбердиев Еңбек қорғау және қауіпсіздікті қамтамасыз ету бойынша «Үздік қызметкер», Аманжол Жайлауов, Махаббат Тілеумұратова, Сағынбай Шопанова, Махамбет Ізтұрғанов «Үздік техникалық инспектор» атанды. Фариза Бекбосынова, Жанболат Шалғабай, Айжан Мұқанова жұмыста үздік көрсеткіштерге жеткені, басқа да басшылар үздік бұрыш, санитарлық жағдайды қалыптастырғаны үшін марапатталса, тағы бірнеше теміржолшы бөлімше директорының арнайы сыйлығына ие болды, – дейді Маңғыстау магистральдық желі бөлімшесінде еңбек қорғау және экология секторының басшысы Тілектес Қондыбаева.
Дәл осындай бағыттағы басқосулар мен турлі номинация бойынша марапаттау рәсімі Маңғыстау қосалқы бөлімінде де өтіп, жүк тасымалы саласында қызмет етіп, қауіпсіздіктің сақталуына атсалысып жүргендер марапатталды.
