Еңбекті қорғау: жасанды интеллект рөлі қандай?

Жамбыл ЖТ бөлімшесінде еңбекті қорғау күніне орай өткен семинар аясында еңбек қауіпсіздігін сақтау, келеңсіз оқиғалардың себебі мен салдарын талқылаған дөңгелек үстел отырысы өткізілді.

Жамбыл жүк тасымалы бөлімшесі филиалының бас инженері Дүйсенбек Садықов Дүниежүзілік еңбекті қорғау күні – билік пен халық назарын жұмыс орындарындағы жазатайым оқиғалар мен кәсіптік ауруларға, еңбек қауіпсіздігі мен өндірісте зардап шеккен немесе қаза тапқан адамдардың тағдырына аударуға бағытталған бастама екенін атап өтті. Биыл атаулы күн аясындағы іс-шаралар «Еңбек қауіпсіздігі мен гигиенасына революциялық тәсілдер: жұмыс орындарындағы жасанды интеллект пен цифрландырудың рөлі» тақырыбын арқау ететініне тоқталды.

Дөңгелек үстел отырысына филиалдың құрылымдық бөлімшелеріндегі еңбекті қорғау саласына жауапты мамандармен бірге, Жамбыл облыстық еңбек инспекциясының бөлім басшысы Бекжан Әбді, Жамбыл облыстық көліктегі санитарлық-эпидемиологиялық бақылау департаментінің бөлім басшысы Сәуле Қожанбекова қатысып, еңбекті қорғаудағы түйткілді мәселелерді талқыға салды. Жамбыл жүк тасымалы бөлімшесі директорының орынбасары Асылхан Тайлақбаев теміржол саласындағы жасанды интеллектіні пайдаланудың негізгі бағыттарына тоқталды.

Жалпы теміржолда жасанды интеллектіні пайдаланудың маңызы зор. Оның негізгі аспектілерінің бірі – теміржолдағы қауіпсіздік деңгейін арттыру екені мәлім. Мысалы, ЖИ объектілерді тану бейнебақылау жүйелері пойызды автоматты түрде тежеу арқылы жолдардағы кедергілерді анықтай алады.  

– Теміржолдарда жасанды интеллектіні қолданудың маңызды бағыттарының бірі – инфрақұрылымның жай-күйін бақылау және диагностикалау. Бүгінде жолдар мен станцияларға орнатылған сенсорлардың көмегімен ЖИ нақты уақыттағы деректерді талдай алады, зақымдануды анықтай алады және ықтимал бұзылуларды болжай алады. Бұл апаттар қаупін азайту және жөндеу шығындарын азайту арқылы ақауларды алдын ала жоюға мүмкіндік береді, – дейді Асылхан Назымханұлы.

Дөңгелек үстел отырысынан кейін бөлімшеде еңбекті қорғау және экология, техникалық инспекторлар арасында байқау өткізілді. Жарысқа қатысушылар «Жұмысшының өмірін сақта!» тақырыбындағы интеллектуалдық ойында қойылған сұрақтарға жауап беріп, арнайы ұйымдастырылған тренингте ситуациялық жағдайларға қарай шартты түрдегі зардап шегушілерге алғашқы медициналық көмек көрсетті.

Айта кетсек, Жамбыл ЖТ бөлімшесіне қарасты ВЧД-27, ТЧЭ-30, ТЧЭ-31 кәсіпорындарында еңбек қауіпсіздігі бойынша өндірістік кеңестер жұмыс істейді. Жамбыл бөлімшесін қоса алғанда, төрт кеңесте барлығы 28 техникалық инспектор сайланған. Еңбекті қорғау күніне арналған іс-шаралар өз міндетіне жауапты қарап, өнімді жұмыс істеген техникалық инспекторларды марапаттауға ұласты. Сондай-ақ өндірісте жазатайым жарақат алған жұмысшыларға материалдық көмек көрсетілді.

Бүгінде еңбекті қорғау мәселелері дәстүрлі бағыттар шеңберінен асып, халықаралық деңгейдегі заманауи жүйеге көшуде. Қауіпсіз еңбекті қамтамасыз ету – мемлекеттік саясаттың басымдықтарының бірі болып қала бермек.