Аға буын өкілдері қашанда алғысқа лайық

Өткен ғасырдың орта шенінен бастап еңбекке араласқан аға буын теміржолшылардың отандық теміржол саласының дамуына қосқан үлесі мол. Солардың бірі атыраулық Сисенғалиева Дәмет апа «Қазақстан темір жолына 120 жыл» медалімен марапатталды.

«Қазан – қамқорлық айы» акциясы аясында және Дәмет апайдың шаңырағына бас сұққан Атырау жүк тасымалы бөлімшесінің бастығы Аслан Базарғалиев 86 жастағы кейуананың хал-жағдайын біліп, марапатын табыс етті. Сондай-ақ ұлттық нақыштағы кестелі қамзол мен орамал, себет толы жеміс-жидек, тәттілер сыйлады.  

Дәметкен әжей 1956 жылы Ескене станциясында «стрелочник» болып еңбек жолын бастапты. Оның міндеті ерсілі-қарсылы өтіп жатқан пойыздарды станция жолдарына бөліп орналастырып, белгілі бағытқа бұрып отыру екен. Осы жұмысты 16 жыл атқарып, содан кейін станция кезекшісі болып ауысады. Бұл жұмысты да 10 шақты жыл абыроймен атқарып, бөлімше мекемелерін сумен қамтамасыз етуші «НОДВОД» мекемесіне ауысып, 1991 жылы зейнетке шыққанша еңбек етті.  

– Ол кезде қазіргідей автоматтандырылған жүйе болған жоқ, жұмыстың бәрін қолмен жасадық. Біздің Ескенеде соғыс жылдарында мұнай өндіру орталығы болған, майданға ұшып кетіп жатқан ұшақтар тап осы жерде жанармаймен қоректеніп, қайта ұшатын. Гурьев мұнай өңдеу зауыты үздіксіз жұмыс жасап, елді жанар-жағармаймен қамтамасыз етіп тұрды. Сол бір сұрапыл соғыс жылдарында бала болсақ та қал-қадірімізше үлкендерге көмектестік. Шағын ғана ауыл аз уақыттың ішінде ауыспалы Қызыл Тумен жеті мәрте марапатталып, Кремльдің алғыс хатын алған, – деді мақтанышпен.  

Дәметкен апайдың отағасы Жолдасов Қосшы да осы станцияда пойыз құрастырушы, станция кезекшісі болған. Өкініштісі, өмірден ерте кеткен. Ата-ана жолын ұл-қыздары да жалғастырды. Ұлдары Мақсот Жолдасұлы мен Асқар Сариев теміржол саласында отыз жылдай еңбек етті. Атырау теміржол техникумын және Алматы теміржол институтын бітірген жоғары білімді, тәжірибелі мамандар болды. Екеуі де еңбек жолын пойыз құрастырушыдан бастап, Ескене, Қарабатанда пойыз қараушы, станция кезекшісі, станция бастығына дейін өсті. Бүгінде арамызда жоқ... Ал қызы Мәншүк пен келіні Қалғыз бөлімшенің логистика және жүк бөлімдерінде абыройлы еңбек етіп жүр.