Соғыс жылдарындағы шойын жол шежіресі
Ақтөбе облысы бойынша меншікті тілші
Биыл Ұлы Отан соғысының жеңіспен аяқталғанына – 80 жыл. От пен оқтың ортасында болып, бейбіт өмірді сақтаған ерлер есімі халық жадынан өшпек емес.
Бүгінде Ақтөбедегі теміржолшылар мұражайында 389 жәдігер бар. Өткен ғасырдың басында отандық теміржол көлігінің бастауында тұрған тұлғалар туралы мәліметтерден бастап, теміржолшылардың революцияға және азамат соғысына қатысуы, Ұлы Отан соғысы жылдарындағы теміржолшылар, соғыстан кейінгі бесжылдықтар, еңбек ерлері туралы жүздеген құжат жинақталған.
Ұлы Отан соғысы жылдарынан сырт шерткен суреттер топтамасында майданға аттанған әскери техникалар мен қару-жарақтар тиелген вагондар, кезінде қолданылған теміржол бұйымдары, ескі телефондар мен сағаттар, т.т. сақталған.
Ақтөбе қаласы үшін теміржол саласының маңызы өте зор. Өткен ғасырдың басында салынған Ташкент-Орынбор темір жолы қала экономикасына оң өзгерістер әкелді. Әсіресе соғыс кезінде теміржолдың маңызы арта түсті. 101-ұлттық атқыштар бригадасы, 312-атқыштар дивизиясы, 29-миномет полкы және басқа да әскери бөлімдер осында жасақталған.
Мұражайда соғыс жылдары 6-7 сыныпта оқитын балалар Мәртөк станциясында төрт сағаттан жұмыс жасап тұрғаны туралы мәлімет бар. Ақтөбе теміржол училищесі соғыс жылдары жұмысын тоқтатпай, теміржол мамандарын дайындаған. Соғыс жылдары Ақтөбе паровоз депосында жұмыс істеген А.С.Дериглазов, Г.Ф.Ворошнин, Ф.П.Шаляпин, К.А.Калинин, В. М.Есаев, И.С.Фролов сынды паровоз машинистерінің есімі тарихта алтын әріппен жазылған.
