«Алтын кітап» қорына енді

Көпті көрген қария, Құрметті теміржолшы, «Түрксіб-Семей» мұражайының құрметті директоры Мақсұт Көшжановтың Түрксіб теміржолының бай тарихы туралы жазылған «Адам – керуен, өмір – жол» атты танымдық кітабы жуырда «Қазақстанның Алтын кітабы» сериясына еніп, қайта жарық көрді.

Бұл жолғы басылымның ерекшелігі өңделіп, толықтырылып, тың мағлұматтармен байытылған. Оған аймақтағы Түрксіб теміржолын зерттеуші өлкетанушылар, тарихшылар мен теміржолдағы іргелі династия өкілдерінің пікірұсыныстары себеп болыпты.  

Ал «Алтын кітап» қорына енуі аталмыш туындының жоғары бағаланып отырғанын білдірсе керек. Айта кетсек, жаңа сериямен жарық көрген кітаптар шығыс өңірінде жоқтың қасы. Бұл ретте авторға №4227 номерлі арнайы куәлік пен төсбелгі салтанатты түрде табыс етілген. Осыған орай жуырда кәсіподақ ұйымының ұйымдастыруымен, филиал директоры Алмас Сейсемқанов пен «Қазтеміржолкәсіп» ҚБ Семей өңірі бойынша өкілі Есен Қажығұловтың қатысуымен бөлімшедегі жастармен кездесу өтіп, қадірменді қарияның жаңа кітабының таныстырылымы болды.  

– Ғибратнама жанрымен жазылған бұл кітап – ұзақ жылдар бойғы еңбек пен ізденістің нәтижесі. Шалғай станциялардағы күлтөкпелерде құм басып жатқан көне жәдігерлерді қайта тірілтіп, Семейдегі мұражай төріне қалай әкеліп қойсам, кешегі Түрксіб құрылысы мен кейінгі қазақ теміржолының өркендеу жолының ұмытылып бара жатқан жарқын тұстарын дәл солайша бүгінгі ұрпақ жадында қайта жаңғырттым. Ал толықтырылған кітаптағы жаңа тараулар тілеулес қалың оқырманның ұсынысымен қолға алынды, – дейді ізденімпаз ақсақалдың өзі.  

Жаңа туынды фотоқағазбен түрлі-түсті болып жарық көрген. Суреттер, ескілікті құжаттар қанық бояумен берілген. Сол тәрізді Түрксіб магистралінің мэтріне айналған әйгілі тұлғалардың ерен еңбектері көрініс тапқан. Айта кетерлігі, автор – кешегі құрыш білекті Түрксіб құрылысшыларының біразының көзін көрген, тәлімін тыңдаған жан. Сондықтан болар, бұл тарау біршама толығып, кешегі қазақ теміржолының тұтас бір дәуірін ашып көрсетеді.  

Наурыздың 22 күні 89 жасқа табан тірейтін, кейінгі буын «Музей ата» атап кеткен ақсақал «қазақ теміржолының тарихын, жәдігерлерін жаңғырту жолында әлі де жанкештілікпен еңбек ете беремін» деп отыр.