Маңғыстауда жыл басынан бері 36 бас малды пойыз қаққан

Теміржол бойында мал бағудың арнайы тәртібі бар. Солай болса да ол тек қағаз жүзінде қалып, шындығында ережені елейтін адам аз. Ал теміржолшылар жыл он екі ай бойы жолға шыққан төрт түлікпен алысып әлек. Сондықтан теміржолшылар малы бар тұрғындар мен шаруа қожалықтары иелеріне малды жол табанынан 300 метр қашықтықта арқандап жаюға және теміржолдан 2000 метр қашықтықта бақылауда бағуға ғана рұқсат етілетінін тағы да ескертеді. Ескерту белгісі немесе арнаулы өтпесі жоқ жерден мал айдап өтуге мүлде болмайтынын айтады.

– Кейде көп малды теміржолдың бір жағынан екінші жағына өткізуге тура келеді. Ондайда мал иесі міндетті түрде жергілікті дистанция- ның жол шеберлеріне алдын ала хабарлауға тиіс. Өкінішке орай, осы қарапайым қағида сақтала бермейді. Маңғыстау жол дистанциясы бойынша өткен 10 айда жолға шыққан мал үшін 260 оқыс тежеу тіркеліп, 36 жағдайда мал шығыны болды. Әсіресе ірі қараның пойызбен соқтығысуы қозғалысқа қауіп төндіреді, – деген Маңғыстау жол дистанциясының жетекші инженері Ержан Артықбаевтың сөзіне сүйенсек жыл басынан қараша айына дейін әкімдік, ЖПБ, НЖС-14 қызметкерлерімен бірлескен рейд нәтижесінде 1169 адам темір жол төңірегіне мал жаю ережесінен құлағдар болған.

Десе де, нәтиже мынау. Мал басылған жағдайда оның иесін табудың өзі қиындық туғызатын көрінеді. Өйткені көпшілік малға ен, сырға, т.б белгілер сала бермейді екен. Сондай себептерден осы он ай ішінде пойызға басылған 36 малдың тек 22-нің иесі табылып, жауапкершілікке тартылған. Қалғаны әлі белгісіз күйде қалып отыр.

– Теміржол арқылы мал айдау немесе жаю ережесін бұзған, қозғалысқа қауіп төндірген мал иелеріне 5 айлық есептік көрсеткіш мөлшерінде айыппұл салынатынын тағы да ескертеміз, – дейді Ержан Артықбаев.