Дистанциядағы құрылғылар кешенді түрде жаңартылып жатыр

Шалқар белгі беру және байланыс дистанциясында автоматика, телемеханика және байланыстың жаңа құрылғыларын енгізуде бірқатар жұмыстар атқарылып жатыр. Қызмет көрсету аумағы аса ауқымды мекемеде тәжірибелі электромонтерлар мен электромеханиктер жетерлік.

Жалпы ұзындығы 595 км асатын темір жол торабына қызмет көрсетіп отырған дистанцияда құрылғылар кешенді түрде жаңарып, заманауи аппараттар мүмкіндігі шалғайдағы теміржолшылар жұмысын жеңілдетуде. Дегенмен, өткен ғасырдың 80-жылдарынан бері жұмыс істеп тұрған көне қондырғылар да жоқ емес.  

Шалқар белгі беру және байланыс дистанциясының бастығы Айдар Еңсеповтің айтуынша, 1981- 82 жылдары Сексеуіл – Шалқар телімінен басталып, Жем – Шалқар телімі бойына орнатылған қондырғылар күтіп ұстаудың нәтижесінде 40 жылдан асты, арасында жөндеуден өткізіліп, әлі күнге жұмыс істеп келеді. Бірақ уақыт көшіне ілесу үшін өндіріс жаңа техника, технология жетістіктерімен қарулануы керек.  

2016 жылы Шалқар – Тассай теліміне қойылған жаңа микропроцессорлық жүйелер жаңашылдықтың басы болды, бүгінде үмітті ақтап тұр. Оның автоматтандырылған өлшемдік жүйесі адамның қатысуымен болатын жұмыс процесін әлдеқайда жеңілдеткен.  

– 2019 жылы бізге Сексеуіл – Жем аралығын қосып берді. Разъездегі кезекшілердің қызметін қоса атқару жүктелді. Жүк тасымалы бөлімшесінен келген жастарды үйреттік. Қазір бәрі жүйеленді. Кезекшілікке тұру, пойызды шығарып салу, т.т. жұмыстарды толық меңгерді, – деді Айдар Еңсепов.  

Дистанцияда барлығы 9 бекет бар. Шалқар – Жем аралығында 3 бекет, Шалқар – Сексеуіл аралығында 6 бекеттің жұмысы ұйымдастырылған. Әр бекетте үш маман еңбек етеді. Мұндағы станция аралығындағы бағдаршамдардың барлығында жарықтандыру қызметі модульдік жүйеге ауыстырылған.

– Модульдік жарықтандыру дистанция жұмысына тиімділік әкелді. Оның үстіне 20 жылдық кепілдігі бар. Қазір жарық беру сапасы жақсарды. Бұрын жанып кеткен шамдарды алмастыру, көрінісін тексеру жұмыстары жоспармен атқарылса, автоматтандырылған жүйемен ол жұмыстар қажет болмай қалды, – дейді дистанция басшысы.  

Айтуынша, дистанциядағы барлық аралық жаңа бағдаршамдармен жаңарған. 2022 жылдан бастап кіріс бағдаршамдарын жарықтандырғыш модуліне ауыстыру жұмыстары басталған. Мұның барлығы адамның қатысуымен болатын жұмысты жеңілдетумен қоса, пойыздар қауіпсіздігін сақтауға ықпалы өте жоғары әрі көрінісі жақсарады екен.  

– Өткен жылы дистанциядағы атқарылған ең ауқымды жұмыстардың бірі – Жылан бекетінде апаттық жағдайда тұрған ғимарат модульді ғимаратқа ауыстырылуы дер едік. Толаскез кезінде пойыздар қозғалысы тоқтатылмай, барлық қондырғыны берілген уақыт ішінде көшіріп, тексеріп үлгердік. Жалпы жақсы нәтижеге қол жеткіздік. Тәжірибелі қызметкерлердің біліктілігіне сын болса, жас мамандарға жақсы тәжірибе болды. Көзімен көріп, қолмен жасау – теориядан әлдеқайда артық, – дейді дистанция тірлігін баяндаған басшы.  

Дистанция тарихы өткен ғасырдың басынан, 1921 жылдан басталады. Орынбор темір жол құрамындағы Шалқар станциясынан ашылған дистанцияның қызмет көрсету аясы Ұлы Отан соғысына дейін Шалқар – Қотыртас – Тоғыз станциясы болған. Кейін қызмет жасау шекарасы ұзартылып, Ембі – Шалқар – Сексеуіл аралығындағы байланысты қамтамасыз етті. Қазір оған Шалқар – Тассай аралығы қосылды. Мекемедегі 341 қызметкердің дені – электромеханик пен электромонтерлар. Қатынап жұмыс істейтіндер модульдік жатын орындармен қамтамасыз етілген.