Ақтөбелік теміржолшылар көктемгі тасқынға тастүйін дайын
Ақтөбе облысы бойынша меншікті тілші
«ҚТЖ» ҰК» АҚ Ақтөбе магистральдық желі бөлімшесі көктемде болуы ықтимал төтенше жағдайларға дайындықты күшейтті. Тасқын кезінде теміржол инфрақұрылымына зиянын тигізуі мүмкін жағдайлармен жұмыс жоспары дайын.
«Теміржолдардың маңындағы су тасқыны салдарынан жол төсемдерін шайып кететін тұстар, ойпат жерлер, зақымданған жерлердің топырақ қабаттарына ерекше көңіл бөлінген. Тасқынға қарсы шаралар аясында қой тастар, рельс топтамасы, темірбетон шпалдары секілді қосалқы бөлшектер жинағы жасақталды. Көлік құралдарының жанар-жағармайлар қоры жасақталды», – деді Ақтөбе магистральдық желі бөлімшесі жол бөлімінің бастығы Бауыржан Хамзин.
2024 жылғы көктемгі су тасқы нына уақытылы дайындау жұмыстары барысында 32 вагоннан тұратын 6 су тасқынына қарсы қызмет пойызы жасақталды. Оның ішінде құралдар мен материалдар, арнайы киім тиелген алты жабық вагон бар. 10 платформа қой таспен толтырылған, кондиционерленбеген темірбетон шпалдар тиелген 12 платформа және рельс пакеттері тиелген 4 платформа дайын. Бұл пойыздар қауіпті аймақ саналатын Орал, Никельтау, Ақтөбе, Қандыағаш, Біршоғыр, Шалқар станцияларына орналастырылды.
Бауыржан Хамзиннің айтуынша, бөлімше бойынша барлығы 147 орын қауіпті аймақ ретінде қаралады. Орал жол дистанциясында 32 орын, Никельтау жол дистанциясында 22 орын, Ақтөбе жол дистанциясында 6 орын, Қандыағаш жол дистанциясында 16 орын, Біршоғыр жол дистанциясында 49 орын, Шалқар жол дистанциясында 22 орын назарға алынды. Қар жалдары құлауы мүмкін тұстарға және мұзды жару үшін бұрғылау жұмыстарына қажетті жарылғыш заттар әзірленді. Қазіргі таңда теміржол бойларын қардан тазалау жұмыстары аяқталды.
Бөлімшеде теміржол төсемінен жоғары орналасқан 16 бөгет пен су қоймасы бар. ПЧ басшыларымен бірлесіп су тораптарының шлюздері тексерілді. Орал, Ақтөбе облыстары аумағында ТЖД-мен бірлескен алдын алу жұмыстары жүруде. Су деңгейін бақылау үшін су ағындарының арналарын өлшеу жүргізілетін көпірлердің тізбесі жасалды. Дабыл қондырғысы және байланыс желілері тексерілді. Қауіпті аймақтарға тәулік бойы кезекшілік қойылған. Жергілікті органдардың басшыларымен бірге су қоймалары мен ауыл шаруашылығы су тоспалары тұрақты бақылауда ұсталынады.