Семейде вагон жетіспеушілігі жоқ
Абай облысы бойынша меншікті тілші
Семей ЖТ бөлімшесінің теміржолшылары ағымдағы жылға жоспарланған жүк айналымын арттыру, транзиттік ағынды қамтамасыз ету шаруаларында тың табыстарға қол жеткізіп отыр.
Атап айтсақ, жыл басынан бергі төрт ай ішінде бөлімше бойынша вагон жетіспеушілігіне жол берілген жоқ. Оған басты себеп, жүк тиеудегі «Қазтеміртранс» АҚ вагондарының үлес көлемінің 70 пайызды құрап, күрт артуы болып отыр. Соның нәтижесінде «Нұрлы жол» бағдарламасы аясындағы республикалық маңыздағы автожолдар құрылысының материалдары Жаңғызтөбе кентіне кедергісіз жеткізілуде. Жүк тасымалындағы тағы бір маңызды жайт, бөлімше басшылығы ағымдағы жылы 12,0 млн тонна жүк тиеуді межелеп отыр. Оның ішінде, жоспар бойынша 9 млн тонна жүкті Қаражыра көмірі құрайды деп күтілуде. Мұның сыртында түсті металл тиеу 500,0 мың тоннадан асырылмақ.
Бөлімше бойынша жүк айналымында транзитті-контейнерлік пойыздарды өткізу маңызды сипатқа ие. Осы бағыттағы жұмыстар соңғы үш жылда сатылап өскен. Мәселен, алдыңғы жылы 177 контейнерлік пойыз өткізілсе, өткен жылы оның саны 429-ға жеткен. Ал, биылғы небары төрт айдың ішінде 184 контейнерлік пойыз қабылданып, өткізілді. Бұл көрсеткіш жыл соңына дейін еселеп өспек.
Тағы бір жаңалық – бөлімше бойынша контейнерлік вагондарға жүк тиеу ісі биылдан бастап қайтадан қолға алына бастады. Жүк айналымын арттырып, вагондардың тұру уақытын азайту мақсатында және локомотив өнімділігін жоғарылату үшін өткен жылдан бастап 60-тан 86 вагонға дейін тұратын ұзын жылжымалы құрамдар жасақталып, жолға шығару ісі қолға алынған болатын. Бұл ретте жолдың баллдық сапасының жақсы болуы себепті Ақтоғай-Семей телімі бойынша 58 пойыз жолға шықса, Семей-ДегелеңАқсу бағытында 100 вагоннан тұратын 46 пойыз жүріп өтті. Аталмыш жұмыстар жүк айналымын жылдамдатып, босаған вагондарды жинап алуда тиімді болып отыр. Мұның сыртында Семей станциясынан Ақтоғай бағытында жалпы салмағы 9000 тоннадан жоғары болатын 15 ауырсалмақты пойыз жіберілді. Жүк тасымалының тиімділігін арттыру тораптық Семей және Жаңа-Семей станциялары бойынша транзиттік пойыздарды өңдеуге кететін уақытты қысқартуға итермелеуде. Осы ретте бөлімшеге қарасты болғанымен Ресей жеріндегі Локоть станциясында құрастырылған 4500 тонналық пойыздар тікелей Орта Азияға жол тартты. Соның есебінен локомотив паркін қысқартудың экономикалық тиімділік көрсеткіші бірден жоғарылапты.