Шымкентте пойыз кідірісін азайту үшін жолдарға КТСМ аспабының жаңа модулі орнатылмақ

КТСМ аспабы – бұл жылжымалы құрамның жай-күйін бақылаудың техникалық құралдарының кешені. Бақылау құралдарының көмегімен ақаулы вагондар мен локомотивтер анықталады. Жүріп келе жатқан жылжымалы құрамға қатысты КТСМ аспабынан «дабыл» түссе, демек бір кінәраттың болғаны. Мұндай жағдайда құрам станцияда тоқтатылып, тексеруден өткізіледі. Қажет болған жағдайда вагон ағытып алынып, ақау жойылады. Осылайша, теміржолда болуы ықтимал апаттың алдын алады. Шымкент белгі беру және байланыс дистанциясы бойынша биыл бақылауға алынған пойыздар саны да, тоқтатылғандарының да саны артқан. Яғни жалпы кідіріс уақыты өткен жылмен салыстырғанда екі сағат 53 минутқа артық. Ал Арыс ШЧ бойынша КТСМ аспаптарымен бақыланатын пойыздар саны артып, тоқтатылғандар саны бес бірлікке азайған. Пойыздардың жалпы кідіріс уақыты өткен жылмен салыстырғанда бір сағат 43 минутқа азайыпты. Теміржолда пойыздардың көп кідірмей, тоқтаусыз қозғалыста жүруі экономикаға тиімді. Сондықтан, ШЧ-37, ШЧ-38 ұжымы КТСМ құрылғыларының жұмысын жақсартуға бар күш-жігерін салуда. Айталық, биыл Манкент станциясының тақ жолына, ал Шымкент станциясының жұп жолына КТСМ аспабының жаңа модулін орнату қарастырылып отыр. Састөбедегі жұп жолға КТСМ-2 бекеті СОБ электро- механикасымен және кабельді топпен бірге орнатылмақ. Сондай-ақ Қостүйін, Темір станцияларында жұмысшылардың біліктілігін жоғарылату үшін техникалық дәрістер жүргізілді.

«Техникалық дәрісте біз жұмысшылардан барлық станциялар бойынша сақтандырғыштарды, релелерді, стативтердегі блоктардың жарамды жай-күйін, типінің сәйкестігін, олардың бекітілу сенімділігінің жануын бақылау схемаларының әрекетін, номиналдың бекітілген құжаттамаға сәйкестігін кезектен тыс тексеруді жүргізуін талап етеміз. Сонымен қатар, байланыс диспетчерлеріне СОБ және байланыс, радиобайланыс, КТСМ, механикалық құрылғыларының күтіміне күнделікті қатаң бақылау орнатуды айтамыз», – дейді ШЧ мамандары.