Озық технология тиімділігі

Арыс белгі беру және байланыс дистанциясының диспетчерлік орталығын мекеменің «жүрегі» десек болады. Жүздеген шақырымға созылып жатқан темір жолдағы қозғалысты алақандағыдай көрсетіп, бақыланып-басқарылатын орталықтың жұмысы өте жауапты.

Қазіргі кезде 300-ге жуық адам еңбек ететін дистанция өздеріне тиесілі учаске бойынша 583 бағыттағыш бұрманы күтіп-баптап, құрылғылардың қалыпты қызмет көрсетуін қамтамасыз етіп келеді. Сондай-ақ 1 037 бағдаршамдық белгі беру құралының күйін мұқият бақылауда ұстайды.  

Бүгінде өңірдегі пойыз қозғалысын реттеу қызметі микропроцессорлы диспетчерлік орталық жүйесінің (МП АСДЦ) озық технологияларының көмегімен іске асырылады. Бұл орталықтандырылған цифрлық жүйенің тиімділігі сол – егер учаскеде белгі байқалмай немесе бағыттағыш бұрма қажет тұсқа аумай қалған жағдай болса, ол туралы ақпарат диспетчерлік орталықтағы экраннан сол мезетте-ақ көрінеді. 2020 жылдан бері жүздеген шақырымға созылған темір жолдағы белгі беру құралдарының қызметі осылайша қадағаланып келеді. Бір ауысымда 4 диспетчер отырады. Оның бірі пультте отырса, екіншісі сарапшы ретінде әрі ауысым жасауға дайын жағдайда жұмысты жалғастырады әрі шұғыл шешім қабылдап, кез келген олқылықты әп-сәтте түзеуге әрекеттенеді.  

– Егерде бір жерде бағыттағыш бұрма тиісті жаққа аумай немесе сигнал ашылмай қалғаны туралы ақпарат түссе, дереу учаскеге жауапты маманға хабар береміз. Ал жұмыстан тыс уақытта осындай олқылық орын алса, арнайы нұсқаулық өткізу арқылы өзге жұмысшыларды іске жұмылдырамыз, – дейді 30 жылдық тәжірибесі бар байланыс диспетчері Нұрғали Насруллаев.  

– МП АСДЦ – микропроцессорлы диспетчерлік орталық жүйесінің тиімділігін көріп отырмыз. Жалпы, озық технологияның аты – озық технология. Соның арқасында телімдер мен жолдардың бос немесе бос еместігін, пойыздың жүріп келе жатқаны немесе тоқтап тұрғаны секілді мың сан шаруаны алақандағыдай айқын бақылап отыруға мүмкіндік бар, – дейді дистанцияның аға диспетчері Мағжан Оразәліұлы.