Құрлық жолы арқылы Түркияға бағыт алған пилоттық контейнерлік пойыз Иранға келді
«Қазақстан теміржолшысы» газетінің тілшісі
Тегеран станциясында Қазақстан, Түркіменстан және Иран елдері арқылы Түркияға бет алған алғашқы құрлықтағы контейнерлік пойызды салтанатты түрде қарсы алу рәсімі өтті.
Бұл салтанатты рәсімге онлайн-режимде қатысқан Қазақстан мен Иран Ислам Республикаларының басшылары Қасым-Жомарт Тоқаев пен Ибрахим Раиси пойыздың одан әрі қарай Түркияға жүруіне сәттілік тілеп, старт берді.
Қазақстан Президенті Иран мемлекетіне жасаған ресми сапары кезінде көлік-транзиттік әлеуетін толық пайдалануға екі жақ та мүдделі екенін атап өтті. Ол Оңтүстік пен Солтүстікті, Шығыс пен Батысты жалғайтын тасымал дәлізі маңызды рөл атқаратынын айтты.
– Бір апта бұрын Қазақстаннан шыққан жүк пойызын бүгін осында қарсы алдық. Енді ол Түркияға бет алады. Күрделі геосаяси ахуал кезінде бұл айрықша маңызды. Біз транзит, ауыл шаруашылығы және өндіріс саласы бойынша келіссөз жүргіздік. Бұл қазақ-иран байланыстарын одан әрі жандандыруға ықпал етеді. Қол жеткізген уағдаластықтар ықпалдастығымызды нығайта түседі, – деді Қасым-Жомарт Тоқаев.
Түркияның Паяс станциясына баратын күкірт тиелген 48 бірлік 20 футтық контейнерден тұратын алғашқы пойыз Павлодар станциясында жасақталды. Пилоттық пойызды «KTZ Express» АҚ ұйымдастырып отыр.
«Қазақстан темір жолы» ҰК» АҚ ұсынған жаңа логистикалық шешім жүк жөнелтушілер үшін ең алдымен жеткізу мерзімі тұрғысынан тиімді. Пойыз Каспий теңізі арқылы өтетін баламалы маршрутпен салыстырғанда небәрі 12 күнде 6300 шақырымнан астам қашықтықты жүріп өтеді. Пилоттық жоба ойдағыдай жүзеге асып жатса, Парсы шығанағы мен Түркия нарықтарына жүктерді жоғары жылдамдықпен жеткізетін тұрақты бағыт қалыптаспақ. Ең бастысы, жүктерді ауыстырып тиеуді талап етпейтін жаңа трансұлттық қатынастың іске қосылуы балама бағыттарды әртараптандыруға және Қазақстан аумағы бойынша контейнерлік жүк ағынын ұлғайтуға ықпал ететін болады.