Көмір экспорты артқан
«Қазақстан теміржолшысы» газетінің тілшісі
Ағымдағы жылдың қаңтар-шілде айларында ҚТЖ желісі бойынша 147 млн тоннадан астам жүк тасымалданған.
Нақтылар болсақ, ағымдағы жылдың алғашқы жартыжылдығында «ҚТЖ» ҰК» АҚ желісіне жүк тиеу 147,6 млн тоннаны құрап, бұл өткен жылдың сәйкес кезеңіндегі көрсеткіштен 0,1%-ға артық болып отыр. Соның ішінде ішкі тасымалдар көлемі 2,7%-ға дейін өсіп, 97,8 млн тонна, ал экспорттық тасымалдар 49,7 млн тонна жүкті құрады.
Сонымен қатар осы жылдың 7 айының қорытындысы бойынша 62 млн тонна көмір тиелген, бұл өткен жылдың деңгейінен 4,6%-ға жоғары болып отыр. Оның ішінде, ел ішіне жөнелтілгені – 42,4 млн тонна. Қатты отын экспорты 12,2%-ға өсіп, 19,7 млн тоннаны құрап отыр. Астық тасымалдау көлемі 4,9 млн тонна деңгейінде, оның ішінде экспортқа жөнелтілгені – 3,7 млн тонна.
Осы кезеңде химиялық тыңайтқыштарды тасымалдау 2,4 млн тоннаны құрап, 7%-ға, мұнай жүктерін тасымалдау 10,5 млн тоннаға дейін өсіп, 4,1%-ға, құрылыс жүктерін тасымалдау 8,8 млн тонна болып, 1%-ға ұлғайды. Темір және марганец кендерін тиеу 12 млн тоннаны, ал түсті кен тиеу 13 млн тоннаны құрады.