Тұрғындардың көмірге деген сұранысы төмендеген

Жамбылдық теміржолшылар жергілікті билікпен бірлесе тұрғындарды қатты отынмен қамтамасыз ету бойынша 31 қазандағы есеппен жоспарды 93,5 пайызға орындады. Көмір тасымалданатын тұйықтардағы жағдай да бақылауда тұр. Бүгінгі таңда облыста көмір сатумен 31 нарық субъектісі айналысады. 35 теміржол тұйығы бар, онда 15 157 тонна көмір түсірілген.

Ал, жалпы 2022-2023 жылдарға өңірге қажетті көмір қоры – 221,1 мың тонна. Оның 60,8 мың тоннасы коммуналдық қажеттелікке, 160,3 мың тонна тұрғындар сұранысына жұмсалмақ. Бүгінде коммуналдық қажеттілікке тиесілі 60,8 мың тонна көмір толық жеткізіліп, жоспар 100 пайызға орындалып отыр. Ал, тұрғындар сұранысын өтеу бойынша керекті көмірдің 145,8 тоннасы жеткізіліп, тасымалдау 91,0 пайызға орындалған.

«ҚТЖ Жүк тасымалы» ЖШС филиалы – «ЖТ – Жамбыл бөлімшесі» директорының логистика бойынша орынбасары Әділ Түсіповтың айтуынша, қазірге дейін теміржолмен 304,1 мың тонна көмір жеткізілген. Оның 97,5 мың тоннасы көрші жатқан Қырғызстан республикасына жүк көліктері арқылы тасымалданыпты. Қалған – 206,6 мың тонна өңірге тиесілі қатты отын.

Қазір Жамбыл облысында Шұбаркөл мен Қаражыра маркалы көмірге сұраныс жоғары. Олардың бағасы тоннасына қарай, шалғай елді мекендерге жеткізу құнын қосқанда тоннасына – 18-21 мың теңге шамасында. Жамбыл, Байзақ, Талас, Мойынқұм аудандарында көмір сатумен айналысатын теміржол тұйықтары жоқ. Бұл ауданның тұрғындары Тараз, Шу қалаларындағы теміржол тұйықтарынан көмір сатып алады.

–  2022-2023 жылдардағы күзгі-қысқы кезеңдерде тұрғындармен тұтынылатын көмірдің көлемі 160,3 мың тоннаға жоспарланды. Былтырғы маусыммен салыстырғанда (188,0 мың тонна) қажеттілік 27,7 мың тоннаға төмендеді. Бұл көрсеткіш 2021 жылы 20 елді мекеннің газдандырылуымен төмендеп отыр, – дейді Жамбыл облысы әкімдігі энергетика және тұрғын үй-коммуналдық шаруашылық басқармасының басшысы Құдайберген Қорғанбаев.