Көмір тасымалы қарқын алды
"Қазақстан теміржолшысы" газетінің Жамбыл облысындағы меншікті тілшісі
Биыл оңтүстік өңір – Жамбыл жеріне алғашқы қар ерте түсті. Қазан айы басталмай жатып, ауа райы күрт құбылып, күн желкем тартып тұр. Осыған байланысты өңірдегі әлеуметтік нысандарға екі апта бұрын жылу беріле бастады.
Қысқы маусымда өңірде 9 жылу энергетика кешені мен 593 автономды қазандық штаттық режимде іске қосылып, 1737 әлеуметтік маңызы бар нысан мен 1700-ге жуық көпқабатты тұрғын үйді жылумен қамтамасыз етеді. 15 қазанға дейін Тараз қаласы толықтай жылу беру маусымына көшеді. Өткен маусымда автономды қазандықтар 61,3 мың тонна, өңір тұрғындары 144,8 мың тонна көмір тұтынған болатын. Мамандар жылу беру кезеңінде қатты отын тапшылығы орын алмағандықтан, жасалған болжам бойынша биылғы тұтынатын көмірдің көлемі осыған шамалас болатынын айтады. Әзірге жылу өндіру және тасымалдаумен айналысатын кәсіпорындар мен қатты отынды тасымалдап-сатушылардың тапсырысы былтырғыдай көлемде сақталып отыр.
Қалай десек те, қатты отынға сұраныс кеміген жоқ. 1 қазанға дейін бөлімшеге қарасты 9 станцияға 840 вагон, 59 мың тоннаға жуық көмір тасымалдаған.
– 30 қыркүйекке дейін Шу станциясына Қызылжар, Дегелең, Қияқтыдан 259 вагон, 17 796 тонна көмір жеткізілді. Қатты отынды тасымалдап-сатумен айналысатын жеке кәсіпкерлік нысандардан бөлек ТЧЭ-30, ПЧ-50, сонымен қатар ПЧМ, ВП-36 құрылымдық мекемелеріне 5 вагон, 345 тонна тапсырыстар бар. Таразға Қызылжардан жөнелтілген 14 вагон, 937 тонна көмірдің 4 вагон, 276 тоннасы ВЧД-27 Жамбыл вагон пайдалану депосына, 1 вагон, 69 тоннасы Жамбыл ЖТ бөлімшесіне келіп жетті. Филиалдың тапсырысымен Маймақ станциясына тағы 1 вагон, 69 тонна, Жамбыл магистральдық желі бөлімшесіне қарасты ПЧ-52 жол дистанциясына – 2 вагон, 138 тонна, ЭЧ -21-ге 3 вагон, 138 тонна қатты отын тасымалданды. Жалпы қазір Маймақта 61 вагон, 4154 тонна көмір бар, – дейді Жамбыл ЖТ бөлімшесі логистика бөлімінің бастығы Әнуар Үркімбаев.
Биылғы тапсырыстар бойынша қатты отынның басым бөлігі Қызылжар, Қияқты, Дегелеңнен тасымалдануда. Тек Мыңарал станциясына ғана Қарабас пен Екібастұздан 273 вагон, 19 110 тонна көмір жеткізіліпті. Қалған Жаңатас, Бурыл, Сарышаған, Түрксіб, Бірлік станцияларына жөнелтуші тарап – осы аталғандар.
Негізінен Тараз қаласында жылу өндіру және тасымалдаумен айналысатын бес кәсіпорын жұмыс істейді. Жылу маусымында олар 1780 нысанды жылумен қамтамасыз етеді. Ал өңірде көмір сатумен айналысатын 30-дан астам нарық субъектісі бар. Мәліметке сүйенсек, бүгінге дейін Тараз станциясына жеткізілген 9 вагон, 592 тонна көмірдің тапсырыс берушілері – «Авангард Ко» ЖШС мен Иманалиев жеке кәсіпкерлік нысаны.
Бөлімше басшылары көмір тасымалы әлі де жалғасатынын жеткізді. Ал ел арасындағы есепшілер биыл қыс ерте келіп, қаһарына мінеді деген болжам айтуда. Сондықтан ауа райына қарай көмірге сұраныс артуы да мүмкін.