Цифрландыру – басым бағыт

«Қазақстан темір жолы» ҰК» АҚ Басқарма төрағасы Елжас Отыншиев Huawei компаниясының Корпоративтік сату жөніндегі аға вице-президенті Лео Ченмен кездесу өткізді. Тараптар ағымдағы өзара іс-қимылды қорытындылады және Қазақстанның теміржол инфрақұрылымын одан әрі технологиялық жаңғырту жөніндегі стратегиялық жоспарларды белгіледі.

Келіссөздер барысында ҚТЖ логистикалық процестерінің қауіпсіздігін, сенімділігі мен тиімділігін арттыруға бағытталған озық цифрлық шешімдерді енгізуге басты назар аударылды. Атап айтқанда, кездесуге қатысушылар бірнеше жобаны егжей-тегжейлі талқылады. Соның ішінде LTE-R байланыс желісін өрістету: теміржол көлігі үшін деректерді үздіксіз беруді және пойыздар қозғалысын сапалы үйлестіруді қамтамасыз ететін сымсыз технологиялық байланыстың мамандандырылған стандартын енгізу.  

Сондай-ақ Деректерді өндеу орталығын (ДӨО) құру: аналитикалық жүйелер мен жасанды интеллектің жұмысын қамтамасыз ету үшін Huawei жетілдірілген есептеу карталарын біріктіруді қоса алғанда, деректерді сақтау мен өңдеудің жоғары технологиялық инфрақұрылымын салу талқыланды. Сонымен қатар Интеллектуалды басқару орталығын (ИБО): нақты уақыт режимінде кешенді мониторинг, технологиялық процестерді визуализациялау және теміржол желісін жедел басқару үшін ахуалдық орталықты орналастыруды іске қосу туралы да сөз болды. Тараптар киберқауіпсіздікті күшейтуді, соның ішінде ҚТЖ-ның маңызды цифрлық инфрақұрылымын заманауи ақпараттық қатерлерден қорғау үшін арнайы киберқауіпсіздік орталығын құруды да талқылады.  

Кездесу барысында Huawei-мен стратегиялық әріптестік ҚТЖ-ға компанияның өңірдің жетекші цифрлық логистикалық операторына айналуын жеделдете отырып, үздік әлемдік тәжірибелер мен инновацияларды енгізуге мүмкіндік беретіні атап өтілді.